Кітайская стужка да Дня перамогі перамагла беларускую ва ўмовах рынка
Беларуская стужка да Дня перамогі каштуе 10 тысяч, кітайская — 5. Бо "у Кітаі заўжды танней". Так розніцу коштаў тлумачаць беларускія вытворцы.
Стужку з яблыневай кветкай у колерах афіцыйнага сцяга Беларусі запусцілі, як альтэрнатыву "георгіеўскай". Адзін з ініцыятараў — Беларускі рэспубліканскі саюз моладзі (БРСМ). Вырабляе святочную сімволіку магілёўскае прадпрыемства ОАО "Лента". Па інфармацыі Еўрарадыё гэтыя стужкі абавязваюць набываць некаторыя гандлёвыя сеткі.
На "Ленце" стужку ацэньваюць у 10 200 рублёў, калі спрабуем замовіць. І абяцаюць якасны матэрыял. Спачатку прадаўцоў Камароўскага рынку хацелі упрыгожыць стужкамі з Магілёва. Але набылі кітайскія ў "Белсаюздруку", бо каштуюць танней — 5 200.
"Мы розныя прадпрыемствы глядзелі, але танней за ўсё ў шапіку, магу патлумачыць дзе", — тлумачаць на Камароўцы.
У шапіку "Белсаюздрук" па праспекце стужак за 5200 ужо няма, разабралі. Завозяць танныя стужкі з Кітая, імпартуе фірма "Ратексбел".
"
"У нас крамы набываюць, паліклінікі, камітэты, БРСМ", — пералічваюць тых, хто замаўляе кітайскую стужку у "Ратексбел".
"Уся кітайская прадукцыя таннейшая, і ў нас сучасная тэхналогія і матэрыял, — тлумачаць кошт на "Ленце" — Усё разлічваецца з улікам нашых затрат".
Атрымліваецца, зрабіць стужку з яблыневай кветкай і прывезці да Дня перамогі танней з Кітая. Сёлета, дарэчы, Мінск упрыгожваюць менавіта такой стужкай, "георгіеўскіх", прынамсі ў цэнтры, няма.