Могуць забраць з сям'і. Прадстаўнік Генпракуратуры распавёў, што пагражае за ўдзел дзяцей у акцыях пратэсту

За ўдзел непаўналетніх у масавых акцыях пратэсту ім самім і іх бацькам пагражае адміністрацыйная адказнасць: ад штрафу да ў крайнім выпадку забірання дзіцяці з сям'і. Пра гэта начальнік аддзела па наглядзе за выкананнем заканадаўства аб непаўналетніх і моладзі Генеральнай пракуратуры Беларусі Аляксей Падвойскі распавёў у эфіры тэлеканала СТБ.

Аляксей Падвойскі заявіў, што ўдзел непаўналетніх у несанкцыянаваных масавых мерапрыемствах азначае парушэнне як унутраных, так і міжнародных прававых актаў, якія рэгулююць правы дзіцяці і адказнасць бацькоў, бо дзіця ў такім выпадку знаходзіцца ў месцы, дзе няма гарантый яго бяспекі, а бацькі нясуць адказнасць за падобныя дзеянні не толькі ў нас, але і за мяжой.
Ён распавёў, што ў асноўным з бацькамі, якія бралі дзяцей на акцыі, праводзяцца гутаркі, а таксама ў іх адрас выносяцца афіцыйныя папярэджанні, але ў некаторых выпадках органы апекі і папячыцельства могуць ставіць пытанне аб сацыяльна небяспечным становішчы дзіцяці.
Як распавёў прадстаўнік Генпракуратуры, калі ў несанкцыянаванай акцыі прымае ўдзел падлетак, старэйшы за 16 гадоў, то на яго, як і на паўналетніх удзельнікаў, можа накладацца штраф. А калі на акцыі з'явілася меншае дзіця, то адказнасць могуць панесці ўжо бацькі па артыкуле 9.4 (Невыкананне абавязкаў па выхаванні дзяцей) Кодэкса аб адміністрацыйных правапарушэннях.
— Мы ўжо па розных фактах папярэдзілі больш за сотню бацькоў, дзяцей. У большасці выпадкаў яны слухаюць словы пракурора. Можна прыводзіць розныя выпадкі ў гарадах — у Жодзіна, Мінску, Брэсце, Гомелі, — калі пракурор вынес бацькам афіцыйнае папярэджанне і пасля гэтага дзіця ў поле зроку праваахоўных органаў не трапляла. І гэта добра, — заявіў Падвойскі.
Па словах Аляксея Падвойскага, канфіскацыя дзіцяці з сям'і ў некаторых выпадках таксама магчыма. У прыклад ён прывёў відэаролік, на якім нецвярозая мама знаходзіцца на несанкцыянаванай акцыі. Згодна з пастановай № 22 Савета міністраў Беларусі і дэкрэтам № 18 Кодэкса аб шлюбе і сям'і, у падобным выпадку становішча дзіцяці можа быць прызнана сацыяльна небяспечным, а яго могуць выключыць з сям'і і змясціць у прытулак або замяшчальную сям'ю на тэрмін да паўгода. Аднак, паводле яго слоў, у гэты час з бацькамі вядзецца рэабілітацыйная работа, каб дзіця як мага хутчэй магло вярнуцца да родных, а само адабранне дзяцей не з'яўляецца мэтай дзяржаўных органаў.
tut.by