На аднаўленне магілёўскага касцёла сабралі амаль 20 тысяч рублёў

На аднаўленне пацярпелага ад ветру Гістарычнага сабора Успення Панны Марыі і Святога Станіслава ў Магілёве сабралі ўжо 19 928 рублёў. Пра гэта паведаміў біскупскі вікарый для Магілёва і Магілёўскай вобласці біскуп Аляксандр Яшэўскі, піша Catholic.by.

Біскуп падзякаваў усім за дапамогу і падзяліўся інфармацыяй аб бягучай сітуацыі і планах далейшых работ па ліквідацыі наступстваў стыхіі.

На гэтым тыдні паставілі часовыя кроквы, каб накрыць будынак касцёла на зіму, і накрылі разбураную частку даху ДСП і руберойдам.

Наступны этап — гэта рамонт усяго даху плошчай 260 кв. м. Аднаўленне пашкоджанай часткі павінен аплаціць уласнік будынка касцёла КУП ЖРЭА Ленінскага раёна Магілёва, а замену другой часткі, якая складае 130 кв. м, Магілёўская парафія. Па камерцыйнай прапанове Магілёўскага ТАА «Бетонстройреставрация», кошт замены ўсяго даху над уваходам у касцёл складзе 77 990 руб. На замену другой часткі прыход павінен сабраць 38 545 рублёў.

Біскуп таксама падзякаваў прыходу ў Будславе за перададзеныя лісты ДСП, а таксама экспертам-альпіністам, якія на працягу тыдня працавалі на даху.

Паводле reform.by.