Ніколі такога не было, і вось зноў. У Пецярбургу згарэў яшчэ адзін пасажырскі аўтобус МАЗ

Раніцай 5 жніўня ў Санкт-Пецярбургу згарэў яшчэ адзін пасажырскі аўтобус МАЗ. Гэта ўжо трэці беларускі аўтобус, які гарыць у Пецярбургу з пачатку лета.

Сігнал пра тое, што ў Петрадварцовым раёне Санкт-Пецярбурга гарыць аўтобус, мясцовае ўпраўленне МНС атрымала ў 06:02. Праз 20 хвілін пажар быў патушаны. Ніхто не пацярпеў, але «аўтобус маркі МАЗ выгарэў па ўсёй плошчы», — паведаміла прэс-служба ведамства.

СМІ удакладняюць, што загарэўся не новы газавы, а дызельны МАЗ, выпушчаны ў 2019 годзе. Такія аўтобусы, як гэты, пафарбаваныя ў блакітны, пецябруржцы называюць сацыяльнымі. Цяпер у горадзе іх баяцца, бо, па-першае, яны гараць, а, па-другое, у іх часта не працуюць валідатары і кандыцыянеры.

Планавалася, што да 1 ліпеня 2020 года Санкт-Пецярбург закупіць каля 900 аўтобусаў МАЗ. Аднак расійская кампанія-перавозчык «Дамтрансаўта», якая абслугоўвае некалькі маршрутаў у Санкт-Пецярбургу, пасля другога пажару зняла з маршрутаў гэтыя аўтобусы і адправіла ўсю партыю на экспертызу.

Ужо вядома, што прычынай аднаго з пажараў стала тое, што ў МАЗе заходнія камплектуючыя «імпартазамясцілі» на «аналагічныя па тэхнічных характарыстыках» айчынныя. Якія апынуліся не зусім аналагічнымі.

Паводле «Е*рарадыё».