Новы міністр працы паабяцала беларусам да канца года заробак у 1 000 рублёў

Аляксандр Лукашэнка прызначыў Ірыну Касцевіч міністрам працы і сацыяльнай абароны, паведамляе прэс-служба прэзідэнта Беларусі. Раней яна займала пасаду намесніка міністра эканомікі.

Кіраўнік краіны даручыў ведамству засяродзіць намаганні на вырашэнні асноўных задач: забеспячэнні высокага ўзроўню занятасці ў краіне і стварэнні эфектыўнага рынку працы, павышэнні ўзроўню даходаў насельніцтва і ўдасканаленні сістэмы абароны уразлівых катэгорый грамадзян, перадае БЕЛТА.
"Стаіць задача ў 2017 годзе стварыць 70 тысяч новых працоўных месцаў. І гэтыя працоўныя месцы павінны быць сучаснымі, якаснымі, эфектыўнымі і мець адпаведны ўзровень заработнай платы, — сказала журналістам Ірына Касцевіч па выніках сустрэчы з Лукашэнкам. — Да канца года сярэдняя зарплата па краіне павінна скласці не менш за 1000 рублёў. Што тычыцца пенсійнага забеспячэння, узровень пенсій павінен складаць не менш за 40% ад сярэднямесячнай заработнай платы ".
Паводле яе слоў, усе гэтыя задачы складаныя, але выканальныя. Урад працуе над іх вырашэннем ў выразнай звязку з усімі прадпрыемствамі, органамі дзяржкіравання і рэгіёнамі.
Ірыне Касцевіч 50 гадоў. Раней яна займала пасаду намесніка міністра эканомікі Беларусі.
Паводле finance.tut.by