«Патрабавалі разарваць партрэт Ціханоўскай». Што вядома пра аблаву ў Светлагорску

На пачатку гэтага тыдня ў Светлагорску прайшлі масавыя ператрусы і затрыманні. Праваабаронцам сталі вядомыя некаторыя дэталі.

Жыхароў горада кашмарылі на працягу двух дзён. Паводле сведчанняў, назіраўся рух немясцовых мікрааўтобусаў ад будынку КДБ да РАУСа і потым па горадзе.

Паведамляецца пра выпадкі, калі для вобшуку ў кватэры выбівалі дзверы, мужчын пры затрыманні збівалі, а каля будаўнічага трэста №20 затрымалі чалавека з відавочнай інваліднасцю (падобна, з сіндромам Дауна), пры гэтым яго збілі з ног ударамі ў жывот, затым даставілі ў РАУС і змясцілі ў ІЧУ.

Агулам, паводле неўдакладненых звестак, былі затрыманыя 17 чалавек. Затрыманых перавозілі і вадзілі па РАУС ў кайданках. Частка людзей — Таццяна Жураўская, Анатоль Змітровіч, Павел Халунін і іншыя — былі змешчаныя ў ізалятар часовага ўтрымання, некаторыя — напрыклад, Людміла Самбурава і Руслан Шаплякоў — адпушчаныя да суда. Вікторыя Шатрова, у якой пасля затрымання ў РАУСе значна пагоршылася самаадчуванне, была адвезеная ў бальніцу і шпіталізаваная.

У наступныя дні судом Светлагорскага раёна былі накладзеныя арышты і штрафы па адміністрацыйных справах. Так, Дзмітрый Жураўлёў арыштаваны на 15 сутак, Аляксандр Мосар — на 10 сутак (ён заявіў, што грошай у яго няма і штраф плаціць няма чым). Штраф у 20 базавых велічынь павінна сплаціць Жураўская (старшыня рэспубліканскага грамадскага аб’яднання сацыяльнай накіраванасці «Людзі плюс»), 10 базавых велічынь — Змітровіч (у мінулым актывіст прадпрымальніцкага руху).

Штраф у 10 базавых велічынь выпісалі пенсіянерцы, былому эколагу Ганне Сомавай. У яе планшэце знайшлі падпіску на «экстрэмісцкія» каналы. Да суда жанчыну пратрымалі ў ІЧУ каля трох сутак, якія запісалі як затрыманне на 72 гадзіны па крымінальнай справе. Разам з ёй у камеры знаходзіліся яшчэ трое гараджанак, змешчаных туды ў выніку гэтых жа затрыманняў.

«Раён застаецца пратэсным дагэтуль». Што вядома пра аблавы ў Фаніпалі

Ад Сомавай запатрабавалі пад відэазапіс разарваць партрэты Святланы Ціханоўскай і яе мужа Сяргея Ціханоўскага.

Спагнанні судом накладаліся паводле артыкула 19.11 Кодэкса аб адміністратыўных правапарушэннях — распаўсюджанне «экстрэмісцкіх матэрыялаў».

Вобшукі і агляды праводзіліся яшчэ ў шэрагу жыхароў горада, але ў іх не знайшлі нічога, што стала б прычынай затрымання.