Твой дом — турма. Навошта мінскіх школьнікаў пацягнулі на экскурсію на Акрэсціна
Інспекцыя па справах непаўналетніх Барысаўскага РУУС арганізавала для школьнікаў экскурсію на Акрэсціна. Таму што юнакам і дзяўчатам, якія ўступаюць у дарослае жыццё, карысна, вядома, загадзя да яго падрыхтавацца, піша партал planbmedia.io.
Тут альбо аўтамат, палігон і вайна, альбо кайданкі, шконка і турма. Пры ўсім багацці выбару іншай альтэрнатывы для беларускай моладзі ў беларускіх уладаў, падобна, няма.
«Прадстаўніца прыёмніка-размеркавальніка для непаўналетніх УУС Мінскага аблвыканкама пазнаёміла прысутных з рэжымам, умовамі знаходжання непаўналетніх у гэтай установе, правяла экскурсію», — гаворыцца ў паведамленні.
Мяркуючы па фота, падлеткам паказалі турэмныя камеры і пазнаёмілі з правіламі ўнутранага распарадку. Пра тое, ці тлумачылі школьнікам, як правільна ўваходзіць у камеру, ведамства змаўчала. У любым выпадку ў краіне, дзе хранічна не да законаў, ранняе знаёмства з турэмным побытам лішнім не будзе.
Глядзіце таксама
На мінулым тыдні planbmedia.io якраз пісаў і пра тое, як школьнікаў возяць на ваенныя палігоны і даюць «палазіць у танку». Не хочаш лазіць у танку — спазнавай хітрасці выжывання ў турме. Таму што наведванне турмы — лагічнае развіццё ідэй з публічнымі пакаяннямі, арыштамі падлеткаў на вачах аднагодкаў і судамі, якія ўлады не саромеюцца праводзіць у школах і ўніверсітэтах.
Беларускія ўлады называюць гэта прафілактыкай правапарушэнняў. Хоць насамрэч больш падобна на мерапрыемствы па прафарыентацыі. У вялікім свеце дзецям прапануюць экскурсіі ва ўніверсітэты, клічуць на лекцыі прафесараў, лекараў і адвакатаў.
Беларускім дзецям у якасці прыкладу для пераймання прапануюць АМАП і турэмных наглядчыкаў. А ў беларускіх уладаў ні прапаноў, ні альтэрнатыў не засталося. Ні для дзяцей, ні для дарослых.
Глядзіце таксама
Нагадаем, што пасля выбараў 2020 года рэжым Лукашэнкі ўзмацніў прапаганду, асаблівыя высілкі скіраваўшы менавіта на дзяцей. У школах і садках паўсюль дзяржаўная сімволіка, дзецям уключаюць гімн, у навучальную праграму ўключылі шэраг «патрыятычных» факультатываў. Таксама праводзіцца ўзмоцненая мілітарызацыя, дзяцей завабліваюць у ваенна-«патрыятычныя» клубы,возяць на экскурсіі ў ваенныя часткі, дзе вучаць працаваць са зброяй, у класы прыходзяць з лекцыямі супрацоўнікі міліцыі.
Як і іншыя намаганні, гэтая палітыка матываваная
разлікам, які неаднаразова агучваў Лукашэнка, — «каб не паўтарыўся 2020 год».