У інфекцыйную бальніцу трапілі сем вучняў мінскага ліцэя БНТУ

Стан дзяцей, што знаходзяцца ў бальніцы, стабільны. Прычын, з-за чаго дзеці трапілі ў бальніцу, не называецца. Аднак частка падлеткаў у больш лёгкім стане знаходзіцца на амбулаторным лячэнні.

У дзіцячую інфекцыйную клінічную бальніцу Мінска дастаўлена сем вучняў Ліцэя БНТУ, частка падлеткаў, “з меншымі скаргамі” знаходзіцца на амбулаторным лячэнні дома, паведамляе «Позірк» са спасылкай на  тэлеграм-канал Міністэрства аховы здароўя.

Падлеткі, якія паступілі ў дзіцячую інфекцыйную бальніцу, «аглядаюцца спецыялістамі бальніцы, сумесна са спецыялістамі кафедраў дзіцячых інфекцыйных хвароб БДМУ», паведамляе Міністэрства аховы здароўя

Стан дзяцей, якія знаходзяцца ў бальніцы, стабільны, аднак канкрэтнай інфармацыі пра прычыны іх шпіталізацыі ведамства не прыводзіць.

“Сітуацыя знаходзіцца на кантролі міністра аховы здароўя Аляксандра Хаджаева, старшыні камітэта па ахове здароўя Мінгарвыканкама Ігара Юркевіча. Спецыялістамі санітарна-эпідэміялагічнай службы Мінска арганізавана правядзенне комплексу спецыяльных мерапрыемстваў па расследаванні сітуацыі”, — гаворыцца ў паведамленні.

Нагадаем, 11 студзеня Мінздароўя паведамляла пра шпіталізацыю ў дзіцячую інфекцыйную клінічную бальніцу Мінска сямі вучняў сярэдняй школы № 165, у траіх з якіх былі прыкметы віруснай кішэчнай інфекцыі.

У ліцэі БНТУ працуе санстанцыя, адзначае «Люстэрка».

Знаёмы з сітуацыяй у ліцэі БНТУ распавёў  «Медыязоне», што ўсім шпіталізаваным паставілі папярэдні дыягназ «востры гастраэнтэрыт». Ва ўсіх, хто трапіў у бальніцу, высокая тэмпература, млоснасць, слабасць.

Па словах суразмоўцы, каля траціны ўсіх навучэнцаў ліцэя цяпер з такімі ж сімптомамі лечацца дома. Усяго ў ліцэі навучаецца 280-290 чалавек.

Суразмоўца "Медиазоны" сказаў, што ўсе навучэнцы харчававаліся ў адной сталовай ліцэя.