У блогера Аляксандра Кабанава выяўлены COVID-19, яго калега Сяргей Пятрухін у шпіталі
Блогеры Аляксандр Кабанаў і Сяргей Пятрухін цяпер знаходзяцца ў Брэсцкай цэнтральнай гарадской бальніцы. Аляксандр Кабанаў трапіў туды 9 траўня пасля таго, як сам выклікаў хуткую дапамогу з-за дрэннага самаадчування.
Аляксандр Кабанаў і Сяргей Пятрухін. Архіўнае фота dw.com
У другой палове дня 12 траўня лекары паведамілі Аляксандру Кабанаву пра станоўчы тэст на COVID-19. Сам блогер кажа, што яму дыягнаставалі правабаковую пнеўманію, а сярод сімптомаў — падвышаная тэмпература (37,5-37,7) і ёсць адчуванне, што знікае пачуццё смаку.
Аляксандр Кабанаў распавёў, што тэмпература ў яго трымаецца ўжо каля трох тыдняў: яшчэ з таго часу, калі ён знаходзіўся ў Пінскім раёне. Дарэчы, па словах блогера, у родным Бярозаўскай раёне ён не быў ужо некалькі месяцаў.
Калі Аляксандр Кабанаў трапіў у бальніцу, ён падпісаў паперу пра правілы распарадку, дзе абавязаўся не выходзіць з палаты. Тут ён знаходзіцца адзін: у палаце ёсць халадзільнік, тэлевізар, рукамыйніца. Ежу пацыентам прыносяць адразу ў палату, а лекары прыходзяць у супрацьвіруснай экіпіроўцы.
Блогер выказаў сваё меркаванне наконт таго, як дзейнічаюць улады ва ўмовах пандэміі:
“Зараз рабіць шмат якія захады ўжо позна. У першую чаргу ўлады павінны былі інфармаваць насельніцтва, папярэдзіць людзей пра тое, што нас чакае. А калі інфармацыі няма — усё выглядае па-іншаму. Заўсёды так было — калі нешта хаваюць, значыць усё не так ужо і добра”, — гаворыць Аляксандр Кабанаў.
У Брэсцкай цэнтральнай гарадской бальніцы, але на іншым паверсе, цяпер знаходзіцца і калега Аляксандра Кабанава — блогер Сяргей Пятрухін. У яго таксама падвышаная тэмпература. У бальніцу Сяргей Пятрухін трапіў пасля суда, які адбыўся 11 траўня ў Брэсце, калі суддзя Дзмітрый Куроўскі прыняў рашэнне арыштаваць блогера на 15 сутак .
Спачатку міліцыянты павезлі Сяргея Пятрухіна з суда ў ізалятар, нават не дачакаўшыся выкліканай хуткай дапамогі. У выніку блогер быў шпітлізаваны ў другой палове дня 11 траўня.
Аляксандр Кабанаў не выключае, што пасля выпіскі з бальніцы яго таксама чакае суд. Блогер распавёў, што некаторы час каля яго палаты знаходзіліся супрацоўнікі міліцыі. З чым гэта звязана, Аляксандр Кабанаў не ведае, а лекары яму нічога не тлумачаць на гэты конт.
baj.by