У Гарадку дзяўчыну адправілі на «суткі» за «лайк» у Instagram. І канфіскавалі тэлефон

Паводле інфармацыі праваабаронцаў, 1 сакавіка ў Гарадку адбыўся суд над дзяўчынай, якая паставіла лайк пад допісам прызнанага «экстрэмісцкім» «Б***та» ў Instagram. Згодна з матэрыяламі справы, міліцыянты забралі яе тэлефон, але Instagram і Telegram былі выдаленыя з тэлефона. Дзяўчына патлумачыла, што выдаліла іх пасля затрымання, бо баялася, што міліцыянты могуць знайсці там нешта «забароненае».

Але сілавікі спампавалі іх зноў. У яе Instagram-акаўнце яны перайшлі ў «захаваныя», дзе былі паказаныя ўсе публікацыі, якія яна «лайкнула». Сярод іх быў пост «Б***та» з «Пагоняй», за што мясцовыя міліцыянты склалі на яе пратакол па арт. 19.11 КаАП («Распаўсюд экстрэмісцкіх матэрыялаў»).

Віну сваю на судзе яна не прызнала. У выніку суд прызначыў дзяўчыне 10 сутак арышту і пастанавіў канфіскаваць яе тэлефон.