У Віцебскім медыцынскім універсітэце прайшлі чысткі «ідэалагічна няправільных» студэнтаў і выкладчыкаў

1 лютага ў Віцебскім медыцынскім універсітэце адлічылі «ідэалагічна няправільных» студэнтаў і звольнілі выкладчыка, паведамляе тэлеграм-канал «Белыя халаты».

З Віцебскага медыцынскага ўніверсітэта адлічылі дзвюх студэнтак — Паліну Нітчанка і Насцю Лявонцьеву. Паліна была арыштаваная на 17 дзён, і яе выключылі з ВНУ за тое, што яна не здолела прыйсці на экзамен, таму што была ў той час арыштаваная. Адлічаная таксама і Насця Лявонцьева, студэнтка 2 курса, якую судзілі разам з Палінай Нікітчанка. Ёй не дазволілі дадаткова пераздаць іспыт.

Звольнены выкладчык Аляксандр Маісееў. Яго судзілі паводле «народнага» артыкула 23.34 КаАП за бел-чырвона-белыя жалюзі і далі штраф, але ён двое сутак правёў у ІЧУ. Таму выкладчыка звольнілі нібыта за «прагулы».

Калі студэнты даведаліся, што Паліну адлічваюць, яны напісалі хадайніцтвы аб тым, каб дзяўчыне дазволілі здаць экзамен, але кіраўніцтва ВНУ яго праігнаравала.