У Івацэвіцкім раёне актывісты дэмакратычных сіл адзначылі гадавіну з дня нараджэння Тадэвуша Касцюшкі

Прадстаўнікі Брэсцкай абласной арганізацыі Беларускай сацыял-дэмакратычнай партыі (Грамада) і грамадзянскай кампаніі "Гавары праўду!" 4 лютага ўзялі ўдзел у мерапрыемствах,
прысвечаных 267-годдзю з дня нараджэння Тадэвуша Касцюшкі — кіраўніка нацыянальна-вызваленчага паўстання 1794 года ў Беларусі, Польшчы і Літве, ганаровага грамадзяніна Францыі, нацыянальнага
героя ЗША і Польшчы.



Як паведаміў БелаПАН брэсцкі сацыял-дэмакрат Андрэй Ваўчок, актывісты ва ўрочышчы Мерачоўшчына Івацэвіцкага раёна разам з прадстаўнікамі дыпламатычных місій і мясцовай улады ўсклалі кветкі да мемарыяльнага знака каля дома-музея Касцюшкі і наведалі музей.
 

Затым дэлегацыя партыйцаў і кампаніі "Гавары праўду!", куды ўвайшлі прадстаўнікі Брэста, Белаазёрска і Івацэвічаў, пабывала ў Косаве. Там яны наведалі брацкую магілу загінулых удзельнікаў паўстання 1863 года, якое ўзначаліў Кастусь Каліноўскі, і хвілінай маўчання ўшанавалі іх памяць.
 

акія акцыі 4 лютага мы праводзім штогод ужо больш як 15 гадоў пад актуальным дагэтуль лозунгам Касцюшкі: "За нашу і вашу свабоду!". Гэты легендарны чалавек заслугоўвае ўшанаванняў і павагі. І сёння, адзначаючы 150-годдзе паўстання Каліноўскага, мы разумеем, што яго прадвеснікам было паўстанне 1794 года пад кіраўніцтвам Касцюшкі", — сказаў Ваўчок.
 

Паводле яго слоў, у Брэсце 2 лютага — у 175-ю гадавіну з дня нараджэння нацыянальнага героя Беларусі Кастуся Каліноўскага — сацыял-дэмакраты распаўсюдзілі прыкладна 300 партыйных тэматычных буклетаў, прысвечаных Каліноўскаму і Касцюшку. Такія ж інфармацыйныя акцыі партыйныя актывісты правялі 3 лютага ў Баранавічах, 4 лютага — у Івацэвіцкім раёне і Белаазёрску.
Ларыса Шыганава, БелаПАН

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: