У мінскім метро патлумачылі, чаму не пусцілі ўдзельнікаў ColorFest
Згодна з правіламі перавозак пасажыраў, у транспарт нельга заходзіць “у знешнім выглядзе, які можа забрудзіць ці пашкодзіць людзей побач”.
Удзельнікі нядзельнага ColorFest, падчас якога ў мінскім парку Dreamland прайшлі "баі" фарбамі-спецыямі, паскардзіліся, што многіх пасля мерапрыемства не пусцілі ў метро.
Прэс-сакратар метрапалітэна Андрэй Кузмін тлумачыць Еўрарадыё, што нічога дзіўнага ў тым, што моладзь не пусцілі на станцыю, няма.
“Ёсць правілы метрапалітэна. Там ёсць такі артыкул, які забараняе пасажырам доступ на станцыю у знешнім выглядзе, які можа забрудзіць ці пашкодзіць пасажыраў побач, ці абсталяванне метрапалітэна”.
Намесніца гендырэктара “Мінсктранса” Зоя Лабатая дадае, што “брудных” пасажыраў таксама могуць не пусціць і ў наземны транспарт. Гэта рэгламентуе глава 13 правілаў перавозак: “Не ствараць сваім станам, паводзінамі і дзеяннямі праблем іншым пасажырам, кіроўцам і кандуктарам”.
“У нас пасажыры нават скардзяцца, што працоўныя горрэмаўтадара, прыбіральшчыкі часам пад’язджаюць некалькі прыпынкаў, хоць іх вопратка чыстая ў прынцыпе, але ўсё адно робяць заўвагу, што ім надзвычай нязручна”.