«Усё пайшло мігрантам». Былы палітзняволены з інваліднасцю застаўся без пенсіі

23 лістапада з калоніі ў Глыбокім вызваліўся палітвязень Аляксей Раманаў. Ён інвалід другой групы, мае анкалагічнае захворванне. Да калоніі ён атрымліваў пенсію па інваліднасці. Цяпер яе не даюць, бо не прыйшлі дакументы з калоніі, піша «Радыё Свабода».

Аляксей Раманаў, фота Радыё Свабода


«У мяне такое адчуванне, што ўлады хочуць маёй галоднай смерці! Калі мяне пасадзілі, я чатыры месяцы не атрымліваў пенсіі па інваліднасьці — столькі часу ішлі паперы з Гомеля ў Глыбокае. Цяпер тая ж гісторыя, толькі іншая геаграфія. Мне не плацяць пенсіі, бо не прыйшлі паперы з Глыбокага! Як я ўжо меў такі досвед, ведаю, што яны могуць ісці яшчэ некалькі месяцаў», — расказаў Аляксей Раманаў.

Працаваць ён не можа па стане здароўя, цяпер чакае новай аперацыі — за час зняволення абвастрыўся рак.

«Пайшоў я ў Гомелі ў Чырвоны Крыж — яны ж нібыта дапамагаюць бедным. Мне там заявілі, што ўся дапамога цяпер ідзе мігрантам на мяжу. Адзінае, прапанавалі ношаную вопратку. Тады я пайшоў у Цэнтр сацыяльнага абслугоўвання насельніцтва. Яны таксама заяўляюць, што дапамагаюць „уразлівым катэгорыям насельніцтва“. Там супрацоўніца сказала: „У нас нічога няма, пустыя фонды, усё пайшло мігрантам на мяжу“. Калі я пачаў абурацца, яна мне параіла, прычым здзекліва, ехаць на мяжу да мігрантаў і там прасіць дапамогі», — дадаў былы палітвязень.

Улетку 2020 года Аляксей Раманаў браў актыўны ўдзел у агітацыйнай кампаніі за Святлану Ціханоўскую. Раманаў выступаў на пікетах, якія ладзіліся ў райцэнтрах Гомельскай вобласці. За выказванні на пікеце ў Хойніках ён атрымаў крымінальную справу за «абразу прэзідэнта». 16 снежня 2020 года суд пакараў яго годам калоніі.

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: