Віцебскі прадпрымальнік абвясціў галадоўку, улады ігнаруюць
45-гадовы Анар Іваноў хоча атрымаць ва ўласнасць памяшканне, якое ён арандуе. Гарадскія ўлады адмаўляюцца.
Паводле Анара Іванова, галадоўку ён распачаў 14 студзеня. П'е выключна ваду, страціў 5 кг вагі. За гэты час прадстаўнікі ўладаў не праявілі да ягонай акцыі аніякай увагі.
Хоць пра галадоўку спавяшчае вялікі транспарант над уваходам у краму "Ліза" на праспэкце Будаўнікоў. Спыняюцца толькі мінакі.
Цікаўным Анар Іваноў тлумачыць прычыны свайго ўчынку: ён незадаволены тым, што 2 мільёны рублёў, якія ён плаціць за арэнду, ідуць невядома на якія мэты.
Цяпер ён хоча абсталяваць на месцы крамы цырульню. І атрымаць ва ўласнасць памяшканьне, у рамонт якога ўклаў немалыя грошы. Паводле ягонага меркавання, ён мае права стаць уласьнікам згодна з Дырэктывай №4 — як асоба, якая арандавала памяшканне працяглы час. Прадпрымальнік кажа, што згодны заплаціць за яго ў растэрміноўку або іншыя прымальныя ўмовы.
Хоча пачувацца гаспадаром, бо ЖРЭА Першамайскага раёну ў любы момант можа павялічыць суму арэнды, а гэта падарве і без таго не надта моцны бізнес. Галадаваць прадпрымальнік збіраецца да вырашэння гарадскімі ўладамі ягонай праблемы.