Назарбаеў распусціў парламент

Нязменны прэзідэнт Казахстана Нурсултан Назарбаеў у сераду прызначыў на 20 сакавіка датэрміновыя выбары, распусціўшы паслухмяны парламент па яго просьбе, і заклікаў «даваць адпор правакатарам» на фоне нараканняў незадаволеных падзеннем ўзроўню жыцця ўслед за падзеннем кошту нафты.



Назарбаеў, які кіруе Казахстанам з савецкіх гадоў, назваў эканамічнае пагаршэнне «глабальным працэсам», на які не можа паўплываць, перадае Reuters.

Тыднем раней дэпутаты заканадаўчага органа, у якім няма ніводнага прадстаўніка апазіцыі, папрасілі прэзідэнта аб роспуску і датэрміновых выбарах, матываваўшы імкненнем заручыцца «новым мандатам даверу народа для практычнай рэалізацыі задач, якія стаяць перад краінай».

Захад не прызнаў сумленнымі і свабоднымі ніводныя выбары ў Казахстане, дзе падзенне эканомікі, якая залежыць ад нафты і металаў, і абвальванне тэнге пагражаюць папулярнасці аўтарытарнага прэзідэнта.

Назарбаеў абяцаў падумаць над просьбай дэпутатаў і задаволіў яе.

Кіраўнік дзяржавы паўтарыў заклік зацягнуць паясы — «жыць па сродках, эканоміць рэсурсы» — і прыгразіў тым, «хто будзе спрабаваць палітызаваць і шукаць вінаватых у пагаршэнні сітуацыі».

Урад паведаміў на мінулым тыдні, што Казахстан можа скараціць затраты з казны ў гэтым годзе і знізіць прагноз росту ВУП з-за падзення кошту нафты, якая можа заставацца таннай яшчэ дзесяцігоддзі.

Падзенне тэнге, што адбывалася насуперак запэўненням уладаў у стабільнасці нацыянальнай валюты, ужо выводзіла на вуліцы Казахстана незадаволеных, але паліцыя жорстка перарывала адносна нешматлікія акцыі пратэсту.

Тэлебачанне Reuters зняло ў сераду ў Алма-Аце акцыю пратэсту дзясяткаў чалавек з ліку пазычальнікаў ў валюце, якім даводзіцца плаціць больш з-за абрушэння тэнге. Яны грукалі ў шкляныя дзверы банкаў, спалілі каля ўваходу кавалкі матэрыі і выказвалі прэтэнзіі на рускай і казахскай мовах.

Назарбаеў звярнуўся да «нашага народу», папрасіўшы «аб’яднацца і даваць адпор, пры неабходнасці заканадаўча, любым магчымым правакацыям ў гэты складаны час».

У Казахстане няма моцных апазіцыйных партый, якія б маглі скласці канкурэнцыю партыі ўлады «Нур Атан», якую ўзначальвае сам Назарбаеў. У ніжняй палаце парламента, сфармаванага ў студзені 2012 года, «Нур Атан» належыць 83 месцы з 107.