«Заявы Лукашэнкі пра ядзерную зброю выглядаюць як інфармацыйна-псіхалагічная аперацыя»
Аляксандр Лукашэнка заявіў, што пастаўка ядзернай зброі ў Беларусь завяршылася ў пачатку кастрычніка. Нібыта ўсё на сваіх месцах і ўсё ў добрым стане. Але эксперты ў гэтым сумняваюцца.
Малюнак створаны штучным інтэлектам
«Я ж казаў ужо, калі скончылася пастаўка. Яшчэ ў верасні па-мойму ці ў кастрычніку. У пачатку кастрычніка апошняя. Усё на сваіх месцах у добрым стане», — заявіў Лукашэнка, адказваючы на пытанні журналістаў перад самітам ЕАЭС у Санкт-Пецярбургу.
Што гэта значыць, Reform.by пагаварыў з экспертам iSANS, які палічыў за лепшае захаваць ананімнасць.
Са слоў эксперта, заявы Лукашэнкі і Пуціна аб тактычнай ядзернай зброі (ТЯЗ) у Беларусі першапачаткова былі штучна прывязаныя да тых ці іншых падзей, а таксама гучалі непаслядоўна або несур'ёзна.
«Пакуль усё гэта выглядае як інфармацыйна-псіхалагічная аперацыя. Так гэта выглядала і раней, пачынаючы з першых заяў, якія былі прывязаныя да важных палітычных падзей у Беларусі і вакол яе. Узгадайце, як гэтая тэма гучна загучала напярэдадні саміту NATO у Вільні. Цяпер — на фоне тупіка ў вайне і калядных святаў, калі Захад сыходзіць на вакацыі. Пры гэтым, калі глядзець рэтраспектыўна, то ў іх у саміх паказанні разыходзяцца — то яны зброю ўжо завезлі, то яны завезлі частку, то яны пакуль рыхтуюць сховішча», — звяртае ўвагу эксперт iSANS.
Ён лічыць, што рэальных фактаў недастаткова, каб гаварыць пра тое, што тактычная ядзерная зброя сапраўды размешчана на тэрыторыі Беларусі.
«Калі казаць пра факты, то застаюцца цягнікі і спецвагоны, якія адпраўляліся з Вязьмы, дзе сапраўды захоўваецца ТЯЗ. Пры гэтым адсутнічаюць іншыя неад'емныя прыкметы размяшчэння боепрыпасаў, уключаючы асаблівыя меры бяспекі вакол меркаваных месцаў захоўвання. Без гэтых абавязковых мер, з улікам блізкасці мяжы з Украінай і неаднаразовых спекуляцый Лукашэнкі на тым, што ён хоча кантраляваць ТЯЗ, яго размяшчэнне выглядае сумніўным. Заявы пра яго больш нагадваюць ІПСА для ціску на ЗША і ЕС з мэтай прымусіць іх вывесці ядзерныя боегалоўкі, якія захоўваюцца ў Еўропе», — сказаў эксперт.
Яшчэ 25 сакавіка Уладзімір Пуцін сказаў, што Масква і Мінск дамовіліся размясціць тактычную ядзерную зброю на тэрыторыі Беларусі, пра што «даўно прасіў» Аляксандр Лукашэнка. Паводле словаў прэзідэнта Расіі, будаўніцтва спецыяльнага сховішча для гэтых узбраенняў скончыцца да 1 ліпеня 2023 года.
9 чэрвеня Пуцін на сустрэчы з Лукашэнкам заявіў, што размяшчэнне расійскай ядзернай зброі ў Беларусі пачнецца адразу ж пасля завяршэння 7−8 ліпеня падрыхтоўкі збудаванняў для яго.
Міністр абароны РФ Сяргей Шайгу адзначаў, што Расія толькі размяшчае ядзерную зброю ў Беларусі, а не перадае кантроль над ёй. Таму рашэнне пра яе выкарыстанне застаецца за Масквой.
Глядзіце таксама
