Ціханоўская, Маляваныч, Івулін і іншыя. Як у Польшчы праходзіць фестываль TUTAKA (шмат фота)

14 і 15 ліпеня каля вёскі Гарадок пад Беластокам праходзіць вялікі фестываль беларускай культуры TUTAKA. «Трыбуна» сабрала фота з імпрэзы.

Месца выбрана не выпадкова: на працягу 30 гадоў тут праводзіўся фестываль музыкі маладой Беларусі «Басовішча», які трывала ўвайшоў у сэрцы не толькі беларусаў, але і іх польскіх сяброў. Цяпер жа за беларускую атмасферу на Падляшшы ў трэці раз адказвае фестываль TUTAKA.

У насычанай праграме фестывалю былі заняткі па магіі, майстар-класы ад «Мова Нанава» ды Маляваныча, сустрэча са Святланай Ціханоўскай і акцыя салідарнасці з палітвязнямі. Вядомы музыка Аляксандр Памідораў выступіў з эмацыйнай прамовай пра свайго сябра, мастака і палітвязня, які загінуў у зняволенні, Алеся Пушкіна.

У суботу ўдзельнікаў чакала ранішняя ёга, інтэрактыўны квэст, гульня ў мяч з Кацярынай Сныцінай, лекцыя па гісторыі і вялікі канцэрт з танцамі.

Сярод гасцей фестывалю можна было сустрэць шмат знаёмых беларусаў: вядучую «Белсат» Кацю Ваданосаву, блогера Сашу Івуліна, оперную спявачку Маргарыту Ляўчук і шмат іншых цудоўных беларусаў.

Фота: «Радыё Рацыя», Іnstagram Кацярыны Ваданосавай.