«Карчма–2015»: Уваходны квіток на фестываль — пара працоўных рук
Дзеля захавання гістарычнай карчмы XVII – XVIII стагоддзяў 12–13 верасня ў в. Гіравічы Валожынскага раёна (35 км ад Мінска) адбудзецца Другі фестываль “Карчма”.
Будынак зазнаў на сваім веку безліч незвычайных падзеяў, сярод якіх –побыт ад’ютанта Напалеона, адпачынак паўстанцаў Каліноўскага, захоп жандарамі пісьменніка і тэрарыста Барыса Савінкава. Карчма знаходзіцца непадалёк ад тагачаснага Лас-Вегаса — славутага мястэчка Ракава, знакамітага ў 20–30-я гады сваім кантрабандысцкім жыццём.
Сёння будынак карчмы патрабуе неадкладнай кансервацыі. Жыхары вёскі сваімі намаганнямі прыбіраюць тэрыторыю, але гэтага недастаткова, і карчма працягвае руйнавацца.
Грамадскасць навакольных вёсак і гаспадары тутэйшых аграсядзіб лічаць карчму сімвалам наваколля, беларускай гісторыі і зацікаўленыя ў яго аднаўленні. Арганізатары фестывалю, мясцовыя жыхары Зміцер Сасноўскі і Анатоль Ганец, адзначылі, што ўжо рыхтуюцца дакументы для рэгістрацыі будынка як помніка архітэктуры, і гэта дазволіць у далейшым уключыць яго ў зялёны маршрут Валожынскага раёна. Таксама у планах арганізатараў аднаўленне двух прыдарожных крыжоў: каталіцкага і праваслаўнага, якія калісьці стаялі тут на скрыжаванні дарог старога Віленскага тракту.
“На дадзены момант мы маем падтрымку ад сельсавета, які дае тэхніку і працаўнікоў, а ўпраўленне ідэалагічнай працы і культуры райвыканкама спрыяе атрыманню ўсіх узгадненняў. Мерапрыемства дабрачыннае, бо не мае вонкавай фінансавай падтрымкі, і ажыццяўляецца выключна за кошт асабістага ўдзелу добраахвотнікаў”, — распавёў Зміцер Сасноўскі. “Уваходны квіток на фестываль — пара працоўных рук, а таксама інфармацыйная падтрымка, націснуць “расказаць сябрам”, — пракаментаваў Анатоль Ганец.
Галоўныя фестывальныя дзеянні будуць сканцэнтраваныя на ўпарадкаванні тэрыторыі. Увечары адбудзецца канцэрт з удзелам гуртоў “Стары Ольса”, “Літы Талер”, “Ceiliсh Сeol”, фальклорнага ансамблю “Гасцінец” з Ракава, танцавальнай падтрымкай ад гурта “Фламея” і інш. Спецыяльны госць — Анатоль Кашапараў (ансамбль “Песняры”). На фестывалі будзе арганізаваная намётавая пляцоўка, прадстаўленая рэтра-тэхніка, палявая кухня.
ФЕСТЫВАЛЬ ЗАПРАШАЕ ДА ЎДЗЕЛУ І СУПРАЦОЎНІЦТВА:
• добраахвотнікаў у працы па карчме і падрыхтоўкі сцэны;
• спецыялістаў па рэкламе ў сацыяльных сетках;
• артыстаў і музыкаў (удзел у канцэрце);
• кіроўцаў з транспартам;
• кухараў і дапаможных кухонных працаўнікоў;
• ахову.
ШАНУЮЦЦА ЎСЕ АДДАНЫЯ НЕЗАЛЕЖНА АД ПЕРАКАНАННЯЎ І МОВЫ!
Заяўкі і рэгістрацыя ўдзельнікаў:
Зміцер Сасноўскі – zsasnouski@tut.by;
Марыя Рагалевіч – +375 44 5779089.
Фестывальная старонка “Укантакце”