FunDay — апошні фэст лета (фотарэпартаж)

Культура 31.08.2015

У апошнюю суботу лета ў Центральным батанічным садзе прайшоў першы "FunDay Festival".

На тэрыторыі Батанічнага саду, вакол возера, размясціліся маркеты, некалькі сцэн, фуд-корты, бразільская вёска, скейт-спот, музей сінтэзатараў, вялікая надзіманая горка і шмат чаго іншага.

Пасля ўваходу на фэст адразу можна было пачуць гукі барабанаў, якія даносіліся з бразільскай вёскі: там кожны мог выпрабаваць сябе ў ролі капаэрысты, станцаваць фора, самбу, а таксама памахаць палкамі ў макулеле.

Размінка

Капоэйра

На супрацьлеглым баку возера ўвагу прыцягвалі разнастайныя маркеты з беларускімі вышыванкамі, рознакаляровым цікавым хэндмэйдам. А яшчэ там можна было абсалютна бясплатна абзавесціся новым пухнатым сябрам. У дадатак выдавалася клетка-пераноска і спіс зробленых жывёлцы прышчэпак. Дарэчы, адзін з капаэрыстаў адправіўся дахаты ў кампаніі маленькага кацяняці.

Хлопец, які ўзяў сабе гадаванца з маркета з кацянятамі

Вясёлыя ды рызыкоўныя мелі магчымасць аздобіць свой твар фарбамі.

А на пляцоўцы "Арт Сусвет" пад знакам "Peace" можна было ўзяць пяро і, загадаўшы жаданне, павесіць яго на вяровачку.

Музей сінтэзатараў

Ахвотныя адразу на фестывалі маглі паўдзельнічаць у трэнінгу асабістага росту. Але пры гэтым варта было ўлічваць, што побач дарослыя і дзеці гуляліся ў радыёкіраваныя цацкі, і падчас праходжання якога-небудзь сур’ёзнага тэсту над вамі мог праляцець самалёт ці праплыць лодка, а той вялікі павук мог кінуцца пад ногі.

Аматары спакойнага адпачынку маглі бавіць час за настольнымі гульнямі, ці маляваць хной альбо маляваць пальцамі.

Дарэчы, днём, да адкрыцця рок-н-рол-караоке, па выспе хадзілі нявесты ў вясельных строях, што дадавала фэсту ўрачыстасці. Але ж хапала і “фрыкаў” у дзіўных гарнітурах — пра гэта паклапаціўся эксперыментальны тэатр "T(e)=Art". Зладжаны ім перфоманс зачароўваў і пужаў адначасова. Зацікаўленыя мінакі, зачараваныя магіяй дзеі, надоўга заставаліся на пляцоўцы ў якасці ўдзельнікаў і назіральнікаў. Са сцэны, сабранай з розных старых рэчаў, гучаў dark-trance ад дыджэя, і ўзаемадзеянне ўдзельнікаў дзеі рабілася больш шчыльным.

Хлопец у масцы аднарога

T(e)=Art перфоманс

Нягледзячы на невялікі кароткі дождж, які напачатку ледзь не разагнаў і без таго нешматлікую публіку, музыкі выкладваліся на 100%. Да выхаду гуртоў CHERRYVATA, NAVY, TonqiXod гледачоў ужо назбіралася значная колькасць, атмасфера была сяброўскай і ўтульнай.