Куды пайсці падчас ЧС, калі вы не фанат хакея

Еўрарадыё склала альтэрнатыўную канцэртна-забаўляльную афішу для на час сусветнага першынства па хакеі.



jazzsubota2.jpg

Афіцыйная забаўляльная праграма для гасцей чэмпіянату свету па хакеі ўражвае. Моцна здзіўляць аматараў хакею на пляцоўках горада будуць сярод іншых поп-фолк гурт “Лялькі карпарэйшн”, ансамбль “Малінаўка компані”, кавер-гурт “Огонёк бэнд”, дуэты “Настальжы” і “Шакалад”, узорны танцавальны калектыў “Зубраня”, Нацыянальны канцэртны аркестр пад кіраўніцтвам Міхаіла Фінберга.

Еўрарадыё складае альтэрнатыўную афіцыйнай афішу івэнтаў, якая дапаможа мінчанам і гасцям сталіцы ўбачыць менавіта беларускі бок айчыннай музыкі і мастацтва.

Самае галоўнае мерапрыемства траўня, якое настойліва раіць наведаць уся рэдакцыя Еўрарадыё, наш уласны фестываль “Дзень радыё”, які пройдзе 23 траўня ў сталічным клубе Re:Public. Сёлета фэст збярэ магутныя музычныя рок-сілы захаду Беларусі — гурты :B:N: i Sciana, і усходу — Nizkiz i Akute, а аб’яднае ўсіх мінскі гурт “Тлушч”. Пры чым, кожны гурт рыхтуе порцыю свежай музыкі адмыслова для “Дня радыё”: чакаецца ажно 5!!! прэм’ер!

13.10.13_-_bn.jpg

:B:N:

Квіткі прадаюцца ва ўсіх касах горада, а таксама праз сайты цікетсэйлераў (Квіткі.by, Ticketpro.by, сайт клуба Re:Public). Кошт ад 110 тысяч. Столікі: 170 тысяч рублёў.

А пакуль мы ўсе чакаем “Дня радыё”, можна прагуляцца і па іншых імпрэзах.

10-11 траўня ў межах Другога Мінскага форуму вулічных тэатраў адбудзецца экскурсія па “Галерэі пад адкрытым небам”. Кіруе праектам славенскі тэатр "Kud Ljud", але робіцца ён сіламі беларусаў. У тым ліку, і звычайных мінакоў, якія проста шпацыруюць па мінскіх вуліцах.

"У дадзеным спектаклі асяроддзем з'яўляецца сам горад з яго адметнасцямі, шнарамі, недасканаласцямі. Па форме гэта экскурсія, гэта спроба ўдзельнікаў і гледачоў звярнуць увагу на горад, у якім мы жывем, на нейкія аб'екты, з'явы, адметнасці, міма якіх мы праходзім як міма чагосьці звыклага. А яны насамрэч могуць быць вельмі цікавымі", — тлумачыць каардынатар праекта з беларускага боку Аляксей Стрэльнікаў.

chalavechki.jpg

"Уварванне" ружовых чалавечак у Мінск (тэатр "Kud Ljud")

“Джазавыя вечары з Банкам БелВЭБ” заяўленыя ў афіцыйнай чэмпіянацкай праграме. Джаз на вуліцах еўрапейскіх гарадоў — прыкмета таго, што ўсё як мае быць. Трапіўшы па мінскія джазавыя вечары, гледачы змогуць пазнаёміцца з сапраўдны якасным і цікавым беларускім джазам (Apple Tea, Tanin Jazz, Трыа Канстанціна Гарачага, шоў-аркестр Ліпніцкага). “Джазавых вечароў” будзе тры, яны будуць праходзіць па суботах 10,17 і 24 траўня на пляцоўцы ля Палаца спорту.

dzhazz.jpg

"Джазавыя суботы ля Ратушы" з гуртом Apple Tea і Шэндай Рул

Хакейным заўзятарам і аматарам якаснага року раім наведаць канцэрт легенды беларускага блюз-року, гурта “Крама". Музыкі на ўсіх сваіх цяперашніх выступах прэзентуюць па новай песні. Канцэрт у “Графіці” 14 траўня — не выключэнне. Праўда, смяецца лідар калектыву Ігар Варашкевіч, замежным гасцям, калі яны, натуральна, уціснуцца ў “кампактны” “Графіці”, усе песні “Крамы” будуць новымі.

dsc_5206.jpg

"Крама"

Галоўныя беларускія музыкі-фрыкі збяруцца 17 траўня ў клубе Re:Public на дабрачынным канцэрце “Дапамажы дзецям разам з намі”. У канцэрце возьмуць удзел “Серебряная свадьба”, “Кассиопея”, “Петля Пристрастия”, “Аддис Абеба”, “Ботаник Проджект”, “РСП”, Дзіма Ску ды Papa Bo Selecta.

voolchitza_piknik-153.jpg

Серебряная свадьба”

Традыцыйна імпрэза пачнецца у 19 гадзін, а скончыцца а 5-й раніцы. Грошы, сабраныя падчас мерапрыемства, пойдуць на аздараўленне выхаванцаў Дзіцячага дома-інтэрната для дзяцей-інвалідаў з асаблівасцямі псіхафізічнага развіцця.

У межах міжнароднай акцыі “Ноч музеяў” ноччу з 17 на 18 траўня лядовая арэна “Юнацтва” (што ў Парку Горкага) запрашае на прэм’еру хакейнай оперы-буф “0:1” маладой мінскай кампазітаркі Вольгі Падгайскай. Гэта будзе гісторыя пра тое, як у сям’і хакеістаў падрастаў сын-музыка. Пасля прэм’еры гледачы змогуць пакатацца на каньках пад гукі жывога сімфанічнага аркестра, музыку гуртоў “Vuraj”, “нагУаль” і Dj LekaPavleka.

18 траўня можна наведаць фестываль беларускай музыкі “Травень”, які пройдзе ў мінскім клубе “Мулен Руж” пры ўдзеле гуртоў “Людзі на балоце”, HandMade, Re1ikt, Naka piano, Тацяны Беланогай, Касі Камоцкай, і Алега Хаменкі.

dsc01204.jpg

Re1ikt

“На нашым фэсце будуць абсалютна непаўторныя, арыгінальныя гурты, аналагаў якім, магчыма, і няма ў іншых краінах. Сярод прычын, па якіх раім схадзіць на “Травень” – гэта адпачыць ад хакея, якога ў гэтыя дні будзе занадта шмат. Мы таксама запрашаем тых людзей, якія хочуць патрапіць у атмасферу нейкай чыстай музыкі”, — разважае арганізатар фэсту Сяргей Будкін.

21 траўня ў Jack Club Neuro Dubel будзе граць святочны канцэрт з нагоды Дня нараджэння яго лідара Аляксандра Кулінковіча. “Дзюбелі” ў чарговы раз выцягнуць з доўгіх шуфлядаў песні 20-гадовай даўніны і традыцыйна акунуць гледачоў у вір вар’яцкага драйву.

yyd_5289.jpg

Neuro Dubel

22 траўня ў клубе “Таранціна” стваральнікі беларускага фолк-мадэрна, гурт “Палац”, сыграюць амаль усе свае песні. Прычым, вядомыя палацаўскія хіты цяпер атрымліваюць новыя аранжыроўкі, а некаторыя з іх робяцца адмыслова для клубных выступаў.

“22 траўня — гэта прысвятак святога Мікалая, — філасофствуе лідар “Палаца” і культуролаг Алег Хаменка. —

Святога, які прызнаны і праваслаўнай, і каталіцкай цэрквамі. Святы Мікалай даруе нават нехрышчоным грэшнікам. Калі нехрышчоныя, а таксама хрышчоныя грэшнікі хочуць далучыцца да танцаў і спеваў, няхай прыходзяць на канцэрт”.

palac_na_kamianicy.jpg

“Палац”