«Славалача» прэзентуе альбом — нягледзячы на пандэмію, рэвалюцыю і вайну
Транскантынентальны фольк-альянс «Славалача» прэзентуе альбом праз два гады, нягледзячы на пандэмію, рэвалюцыю і вайну
«Славалача» — гэта альянс фолк-музыкаў і творцаў з Беларусі, Украіны і рэгіёна Апалачы ў ЗША. Гэты саюз стварыўся ў Афінах ў 2019 годзе і набыў сваю поўную форму ў студзені 2020 года ў Львове, але планы сапсавалі пандэмія і жнівеньская рэвалюцыя ў Беларусі, паведамляе "Будзьма".
Пасля 20 месяцаў жыцця ў сваіх краінах музыкі здолелі ўз’яднацца ва Украіне ў жніўні 2021 года. Нягледзячы на абмежаванні ў часе, сціплыя фінансавыя магчымасці, музыкі стварылі свой першы альбом, напісаны ў Карпатах і запісаны ў Цярнопалі. Тады і гурту, і ўсяму свету было невядома, што Украіна знаходзіцца на мяжы вайны з Расіяй — вайны, якая зробіць такі альянс больш вострым і важным, чым калі-небудзь.
Альбом складаецца з дзесяці песень пераважна народнага паходжання, з Украіны, Беларусі і Амерыкі. Нягледзячы на тое, што ўся музыка была абраная для захавання традыцыйнай культуры, з-за нейкага павароту містычнай выпадковасці, больш чым палова песень раскрывае тэмы вайны.
Аднайменны альбом адкрывае песня «Мікалай», напісаная Братам Хілам у беларускай вёсцы Стойлы. Песня распавядае пра народнага героя і цэсляра Мікалая Тарасюка, які адзін жыў у сваёй вёсцы пасля таго, як усе яе пакінулі. Місіяй Тарасюка было захаваць сваю вёску праз разьбу мініяцюрных драўляных скульптур жыхароў за іх паўсядзённымі справамі, якія калісьці там жылі.
«Жэ» — украінская традыцыйная гуцульская калядная песня. Версія, якая запісана на альбоме «Славалачы», выйшла падчас Каляд. Гэтую версію песні Марычка Чычкова і Марта Боднар запісалі ад сляпой гуцульскай жанчыны з вёскі Явораў у 2018 годзе.
Беларускую ваярскую песню «Дунаю Дунаю» прынёс у калектыў беларускі музыка Сяржук Доўгушаў. Гэта старадаўняя беларуская мужчынская песня, якая распавядае пра набліжэнне вайны. У межах гэтага трэка гучыць і украінская традыцыйная песня «Ой атдае» — крык дзяўчыны, якая страціла маці на вайне. Гучанне ланцугоў напрыканцы трэка нагадвае слухачу пра трагічныя вынікі вайны.
Вытворчасць альбома стала магчымым з дапамогай шэрагу ўдзельнікаў кампаній па зборы сродкаў на IndieGoGo і Facebook. Увесь шлях Славалачы задакументаваны ў фільме «Дарога на Славалачу», тэрмін вытворчасці якога быў падоўжаны з-за ваенных падзей.