9 траўня. Хваравіты і сумны Лукашэнка ў Маскве, прамова Ціханоўскай

Сёння, 9 траўня, у шэрагу постсавецкіх краін святкуецца 78-я гадавіна перамогі ў Вялікай Айчыннай вайне. Аляксандр Лукашэнка ў гэты дзень быў вымушаны паехаць у Маскву, дзе разам з кіраўнікамі Казахстана, Таджыкістана, Узбекістана, Кыргызстана, Туркменістана і Арменіі паслухаў прамову Уладзіміра Пуціна на Краснай плошчы.

Гэты візіт Лукашэнкі не анансаваўся. Яго прэс-служба коратка паведаміла пра паездку толькі ўчора вечарам, калі расійскія медыя ўжо апублікавалі відэа лукашэнкаўскага картэжа ў Маскве.

Прэс-служба чамусьці назвала візіт у сталіцу Расіі працоўным.

Выглядае, што Лукашэнку фактычна прымусілі наведаць РФ у Дзень Перамогі, бо папярэдне аб гэтым ніяк не згадвалася. Першапачаткова ў Мінску планаваўся звычайны сцэнар святочных мерапрыемстваў з ранішнім ускладаннем кветак на Плошчы Перамогі, у якім звычайна бярэ ўдзел дыктатар. Аднак незадоўга да 9 траўня фармат моцна скарэктавалі — перанеслі цырымонію з кветкамі ля Вечнага агню на вечар. Як мяркуецца, да гэтага часу Лукашэнка паспее вярнуцца ў Мінск.

Шмат хто звярнуў увагу на тое, што на фота і відэа з Краснай плошчы Лукашэнка выглядае хваравіта. Марудна перасоўваецца, выраз твару досыць хмурны. За колькі дзён да 9 траўня ён уручаў чарговыя ўзнагароды сваім прыхільнікам у сваім жа палацы ў цэнтры Мінска. Зноў жа, многія тады заўважылі праблемы з голасам Лукашэнкі, які прамаўляў цяжка і вельмі сіпла, і зрабілі здагадку, што кіраўнік рэжыма захварэў. Пасля той урачыстай цырымоніі ён на тры дні знік з публічнай прасторы.

«Святам пад назвай «Дзень Перамогі» будзе іншая дата»

Нягледзячы на праблемы са здароўем, не паехаць у Маскву Лукашэнка не мог. Яго залежнасць ад расійскай падтрымкі на сёння настолькі вялікая, што прымушае выконваць усе загады «старэйшага брата».

Што да прамовы Пуціна ў Маскве, то яна была, як кажуць, «ні аб чым». Звычайны набор прапагандысцкіх крамлёўскіх штампаў пра злосны Захад і Расію, якая змагаецца з сусветным «нацызмам».

«Пуцін зрабіў сур'ёзную заяўку на перамогу ў конкурсе «самы шэры выступ у гісторыі Краснай Плошчы, — адзначыў з гэтый нагоды палітычны аглядальнік Аляксандр Фрыдман. — І гэта ўсё для таго, каб заявіць пра «сапраўдную вайну» супраць РФ, падкрэсліць важнасць «традыцыйных каштоўнасцяў» і, зразумела, падзяліцца патыхаючым навізной тэзісам пра Захад, які арганізаваў «дзяржаўны пераварот» ва Украіне?».

У сваю чаргу з прамовай да 9 траўня выступіла Святлана Ціханоўская.

Паводле яе слоў, 9 мая 1945 года — гэта «не толькі Дзень памяці ў гісторыі чалавецтва», але яшчэ і «стартавая кропка, якую ўсе краіны — удзельніцы вайны выкарыстоўвалі для таго, каб больш не ваяваць, а будаваць квітнеючыя і развітыя дзяржавы».

«І толькі дыктатары выкарыстоўвалі яе для таго, каб загразнуць у крызісе і пачаць новую жахлівую вайну», — адзначыла лідарка беларускіх дэмакратычных сіл.

«Мой прадзед Афанасій, які дайшоў да Берліна, быў бы ў жаху, даведаўшыся, што Дзень Перамогі з дня "ніколі больш" ператварыўся ў кашмарнае "можам паўтарыць", — падкрэсліла Святлана Ціханоўская. — Але мы — беларусы. І ў нашага народа ўсё яшчэ ёсць выбар. Які шлях развіцця нам бліжэй? Рэпрэсіі, войны, крызіс, міжнародныя ваенныя злачынствы, перапісванне гісторыі, вымыванне лепшых спецыялістаў — ці ўсё ж такі свабода, інтэграцыя ў еўрапейскую эканоміку, рост узроўню жыцця, годныя зарплаты і пенсіі, магчымасць свабодна падарожнічаць па свеце, інвестыцыі ўсяго цывілізаванага свету ў нашу краіну?».