Атака мігрантаў на Польшчу – спецаперацыя Расіі?
Атака мігрантаў на Польшчу з Беларусі — гэта гібрыдная атака, спецаперацыя РФ, ідэальна сінхранізаваная з іншымі расійскімі спецаперацыямі, заявілі ў Польшчы.
Мігранты на мяжы. Фота twitter.com/MON_GOV_PL
Атака мігрантаў на Польшчу з Беларусі — гэта гібрыдная атака, спецаперацыя РФ, ідэальна сінхранізаванай з іншымі расійскімі спецаперацыямі, заявілі ў Польшчы.
Міністр замежных спраў Збігнеў Раў разам з міністрамі нацыянальнай абароны, унутраных спраў і адміністрацыі Марыюшам Блашчакам і Марыюшам Каміньскім прынялі ўдзел у брыфінгу, прысвечаным сітуацыі на мяжы з Беларуссю.
Як падкрэсліў кіраўнік польскай дыпламатыі Збігнеў Раў, узведзеная на мяжы агароджа з'яўляецца адказам Рэспублікі Польшча на агрэсію расійскага імперыялізму, піша «Польскае радыё».
– Сёння расійскі імперыялізм характарызуецца перш за ўсё цэлым комплексам спецаперацый. Мы памятаем спецаперацыю, якой была другая чачэнская вайна, спецаперацыю ў Грузіі ці апошнюю — ва Украіне. Але атака на Польшчу, гібрыдная атака, таксама былі спецаперацыяй, ідэальна сінхранізаванай з іншымі, – сказаў міністр Раў. Ён дадаў, што кіраўнікамі яе зʼяўляюцца расіяне, а выканаўцам – рэжым Лукашэнкі.
На думку кіраўніка польскага МЗС, ніхто ў трансатлантычнай супольнасці не сумняваецца, што барʼер на мяжы з Беларуссю зʼяўляецца таксама ўсходнім шчытом NATO.
«Гэта шчыт волі і рашучасці, якія мы праявілі перад абліччам гэтай агрэсіі. Калі б гэтага не здарылася, то Польшча стала б – не сёння, а два гады таму – Лампедузай. Насычанай імігрантамі, многія з якіх прайшлі ваенную падрыхтоўку», – сказаў міністр Раў.
Глядзіце таксама
Кіраўнік польскай дыпламатыі падкрэсліў, што пераважная большасць польскага грамадства выказвае падзяку салдатам і афіцэрам, якія ахоўваюць польскую мяжу.
Нагадаем, невялікі італьянскі вулканічны востраў Лампедуза ператварыўся ў свайго роду перавалачны пункт для нелегальных імігрантаў з Афрыкі. Плошча вострава — толькі каля 20 квадратных кіламетраў, дзе жыве каля 6 тысяч чалавек. У 2000-я гады на востраў штогод прыбывалі сотні тысяч нелегальных на перапоўненых лодках і шлюпках у надзеі перасяліцца ў Італію і пачаць там новае жыццё. Многія гінуць падчас такіх плаванняў. Так, напрыклад, паводле арганізацыі ААН па справах бежанцаў, у 2014 годзе на розных лодках праз Міжземнае мора пераправіліся не менш за 218 тысяч мігрантаў, пры гэтым каля 3500 чалавек патанулі пры крушэнні транспарту.
Глядзіце таксама
Як пісаў НЧ, палітолаг Павел Усаў адзначыў, што Рашэнне пра вывад «вагнераўцаў» будзе прымацца ў Крамлі. А для Крамля трымаць «вагнераўцаў» у Беларусі выгадна, бо яны эфектыўна раздражняюць краіны ЕС. Палітолаг не верыць у тое, што Лукашэнка спыніць паток нелегальных мігрантаў, паколькі гэта сумесная з Расіяй аперацыя.