Усаў: Рашэнне пра вывад «вагнераўцаў» будзе прымацца ў Крамлі
Ці сыдзе «Група Вагнера» з Беларусі і ці спыніцца нелегальная міграцыя з беларускай тэрыторыі? І што будзе на мяжы? Польшча гатова адкрыць пункты пропуску на мяжы з Беларуссю, калі Аляксандр Лукашэнка пойдзе на саступкі, заявіў польскі бок, адзначае «Польскае Радыё».
Беларуская мяжа. Фота: Ludek, CC BY-SA 2.5, via Wikimedia Commons
Так, намеснік кіраўніка МУС Мацей Вонсікзаявіў, што калі рэжым Лукашэнкі пойдзе на саступкі, то Польшча гатова нават адкрыць некаторыя з раней закрытых памежных пераходаў, піша «Польскае радыё».
«Хочам паказаць свету і Лукашэнку, пра што ідзе размова. Ад чаго ідуць нашы рашэнні і што напрыканцы тых рашэнняў. Калі сітуацыя надалей будзе абвастрацца, калі дойдзе да інцыдэнту, калі камусьці прыйдзе ў галаву выкарыстаць «Групу Вагнера» для стварэння інцыдэнтаў на нашых межах, наша рэакцыя будзе супольнай, катэгарычнай. І прывядзе да аднаго выніку — абсалютнай ізаляцыі Беларусі, гэта значыць да закрыцця меж на польскай, латвійскай або літоўска-расійскай мяжы». Пра гэта намеснік кіраўніка Міністэрства ўнутраных спраў і адміністрацыі Мацей Вонсік сказаў у эфіры TVP Info, калі адказваў на пытанне аб магчымасці поўнага закрыцця памежных пераходаў з Беларуссю. На думку Вонсіка, калі Беларусь не хоча быць ізаляванай, яна таксама павінна супрацоўнічаць у міграцыйнай палітыцы.
Глядзіце таксама
Палітолаг Павел Усаў звяртае ўвагу, што яшчэ на мінулым тыдні гучалі радыкальныя заявы аб закрыцці ўсіх памежных пераходаў з Беларуссю. Але цяпер сітуацыю пераацанілі, бо зразумелі, што ўльтыматумы пагоршаць і так крытычную сітуацыю на межах. Лукашэнка на ўсе ўльтыматумы адказвае яшчэ больш неадэкватнымі дзеяннямі:
— Такое ваганне, змена стаўлення сведчаць аб тым, што ў тых, хто прымае рашэнне, няма разумення сітуацыі. Няма сістэмнага падыходу і ацэнкі сітуацыі, асабліва ў палітычна-ідэалагічнай гульні з рэжымам. Калі ты тыдзень таму ставіў ультыматум, то павінен вытрымаць паўзу. Такая сітуацыя паказвае слабасць еўрапейскіх палітыкаў, а Лукашэнка ў ідэалагічным плане зноў выглядае рашучым. Палітыка з такімі постацямі, як Лукашэнка ці Пуцін, так не вядзецца. Альбо ты выбіраеш жорсткую палітыку, альбо чакаеш, калі хочаш змяніць правілы сваёй уласнай гульні. Хоць я асабіста супраць закрыцця меж.
Калі казаць пра пастулат вывядзення «вагнераўцаў», то гэта недахоп аб’ектыўнай інфармацыі аб пазіцыі Лукашэнкі, кажа Павел Усаў. Рашэнне пра вывад «вагнераўцаў» будзе прымацца ў Крамлі. А для Крамля трымаць «вагнераўцаў» у Беларусі выгадна, бо яны эфектыўна раздражняюць краіны ЕС.
Палітолаг не верыць у тое, што Лукашэнка спыніць паток нелегальных мігрантаў, паколькі гэта сумесная з Расіяй аперацыя.
Глядзіце таксама
