Канапацкая заявіла пра свае прэзідэнцкія амбіцыі

Дэпутат Палаты прадстаўнікоў Ганна Канапацкая распавяла пра свой магчымы ўдзел у наступных прэзідэнцкіх выбарах у Беларусі.

«Я, калі толькі пачынала сваю палітычную кар'еру, выбрала для сябе добра вядомы дэвіз: «Дрэнны той салдат, які не марыць стаць генералам». А што такое «генерал» у беларускіх палітычных рэаліях? Зразумела, гэта прэзідэнт», — сказала Ганна Канапацкая, адказваючы на ​​пытанне Радыё Свабода.
«Аднак сёння пакуль я не магу адназначна і дакладна заявіць пра свой удзел у прэзідэнцкай кампаніі», — дадала дэпутат.

Што бянтэжыць Канапацкую?

Ганна Канапацкая кажа, што галоўнае, што пакуль стрымлівае яе ад аб'явы старту сваёй выбарчай кампаніі — гэта няўпэўненасць, што яна зможа сабраць 100 тысяч подпісаў выбаршчыкаў у сваю падтрымку.
«Дэпутат Палаты прадстаўнікоў не мае ніякіх прывілеяў у параўнанні з іншымі ўдзельнікамі прэзідэнцкай кампаніі. Мне таксама трэба будзе сабраць 100 тысяч подпісаў. І тут узнікае пытанне: хто мне ў гэтым дапаможа? Фармальна я сябра Аб'яднанай грамадзянскай партыі. Але ніякай упэўненасці, што партыя мне дапаможа, у мяне няма. І нават калі б уся партыя раптам падтрымала маю кандыдатуру, гэта становішча прынцыпова не мяняе.
Я добра памятаю апошнія прэзідэнцкія выбары, калі збіралі галасы за лідэра АГП Анатоля Лябедзьку. Вынік той кампаніі вядомы — усё разам сабралі толькі каля паловы неабходных подпісаў», — патлумачыла Ганна Канапацкая.
Паводле belaruspartisan.by