«Паспалітае рушэнне» Сахашчыка атрымала прызнанне рэжымам Беларусі. Пакуль што як «экстрэмісцкае фарміраванне»

Пра гэта паведамляюць прарэжымныя тэлеграм-каналы. Адзначым, што ў «Пераліку арганізацый, фарміраванняў, індывідуальных прадпрымальнікаў, якія маюць дачыненне да экстрэмісцкай дзейнасці» «Паспалітага рушэння» пакуль няма.

Паводле прадстаўнікоў рэжыму, ініцыятыва прызнана «экстрэмісцкім фарміраваннем» «за арганізацыю дзейнасці па падрыхтоўцы здзяйснення замахаў на суверэнітэт і грамадскую бяспеку Рэспублікі Беларусь».
«Паспалітае рушэнне» — спартова-адукацыйная арганізацыя, створаная, каб аб’яднаць беларусаў з мэтай абароны незалежнасці Беларусі.
Харугвы рушэння з верасня ствараюцца за межамі Беларусі. Паведамлялася, што ў харугвы ў Польшчы ў першы дзень запісаліся 800 чалавек.
Нагадаем, новае ўтварэнне на чале з прадстаўніком Аб'яднанага кабінета па абароне Валерыем Сахашчыкам — «аб’яднанне беларусаў з мэтай абароны незалежнасці Беларусі і ўзнаўлення законнасці на тэрыторыі нашай краіны», якое спрыяе «фізічнаму і інтэлектуальнаму развіццю грамадзянак і грамадзян» і «адраджэнню беларускіх вайсковых традыцый».
Як паведамляецца ў прэс-рэлізе, складацца «Паспалітае Рушэнне» будзе з харугваў, кожная з якіх мусіць належаць пэўнаму гораду. Праз немагчымасць захаваць бяспеку ўдзельнікаў у самой Беларусі харугвы пакуль не плануюцца. АПК адзначае, што гэта часовая мера.
У першыя харугвы ўжо назначаны ротмістры. Як гаворыцца ў рэлізе, гэта «аўтарытэтныя і дасведчаныя кандыдаты».
Удзел у харугвах добраахвотны, без полавых і ўзроставых абмежаванняў. Усе чальцы харугваў мусяць прайсці 7-дзённую бясплатную падрыхтоўку, у межах якой яны атрымаюць патрэбную экіпіроўку.
На дадзены момант абвешчана пра стварэнне Віленскай, Варшаўскай, Уроцлаўскай і Беластоцкай харугваў.