Рада Еўропы прызнала факт незаконнага перамяшчэння ўкраінскіх дзяцей у Беларусь

Рада Еўропы на Саміце кіраўнікоў дзяржаў, які адбыўся ў Рэйк’явіку 16–17 траўня, паставіла Беларусь побач з Расіяй у выніковай дэкларацыі, дзе казалася, што ўсе вінаватыя за вываз украінскіх дзяцей будуць пакараныя.

Як і чакалася, адпаведная дэкларацыя была прынятая на Саміце кіраўнікоў дзяржаў і ўрадаў краін — чальцоў Рады Еўропы, які адбыўся ў Рэйк’явіку 16–17 траўня.

Прымусовы вываз украінскіх дзяцей на тэрыторыю Беларусі адзначаны ў спецыяльным дадатку да дэкларацыі.

Аб’яднаны Пераходны Кабінет Беларусі — часовы выканаўчы орган, створаны нацыянальнай лідаркай Святланай Ціханоўскай, адзначае, што ў гэтым рашэнні ЕС ёсць і іх унёсак. І адзначае, што прыняты дакумент — гэта ў тым ліку вынік працы намесніка кіраўніцы Аб’яднанага Пераходнага Кабінета, кіраўніка НАУ Паўла Латушкі, які напярэдадні правёў шэраг рабочых сустрэч у Страсбуры з прадстаўнікамі Рады Еўропы і Еўрапарламента.

Каманда НАУ адзначае, што працягвае работу над прыцягненнем да крымінальнай адказнасці Лукашэнкі і прадстаўнікоў беларускага рэжыму ў тым ліку і за ваенныя злачынствы.

У выніковай дэкларацыі Рады Еўропы Беларусь стаіць побач з Расіяй з-за вывазу ўкраінскіх дзяцей, і розных падыходаў да дзвюх краін не пазначана. Сярод іншага ў выніковай дэкларацыі адзначаецца:

«Зноў пацвярджаем, што ўсе дзеці ва Украіне маюць права карыстацца ўсім спектрам правоў чалавека, замацаваных у адпаведных міжнародна-прававых дакументах, і што найлепшыя інтарэсы дзіцяці павінны быць галоўным фактарам пры прыняцці рашэнняў.

Выказваем сур'ёзную заклапочанасць у сувязі з фактамі забойстваў, раненняў і сексуальнага гвалту над дзецьмі, незаконнай перадачы і дэпартацыі ўкраінскіх дзяцей расійскімі сіламі ў Расійскую Федэрацыю і Беларусь або на тэрыторыі, часова кантраляваныя або акупаваныя Расійскай Федэрацыяй, і іх прымусовага размяшчэння знаходжанне пад апекай або ўсынаўленне грамадзянамі Расіі і іншыя парушэнні іх годнасці і правоў.

Падкрэсліваем, што ўсе злачынствы, учыненыя супраць дзяцей, павінны быць незалежна расследаваныя, а іх злачынцы не павінны застацца беспакаранымі ў адпаведнасці з агульнымі прынцыпамі міжнароднага права і міжнароднага гуманітарнага права. Зноў заяўляем аб нашай падтрымцы незаменнай працы нацыянальнага і міжнароднага правасуддзя, каб гарантаваць, што за злачынствы, учыненыя ва Украіне, будуць прыцягнутыя да адказнасці ўсе вінаватыя».

Навошта рэжыму Лукашэнкі скрадзеныя ўкраінскія дзеці?

Нагадаем, як пісаў «НЧ», нядаўна праўладная партыя «Белая Русь» заявіла, што ладзіць сумесныя праекты з расійскім агенцтвам «Рассупрацоўніцтва». Яны нібыта будуць накіраваныя на «дапамогу дзецям, якія пацярпелі на тэрыторыях» так званых «Данецкай і Луганскай народных рэспублік».

А 5 траўня Беларусь адказала на абвінавачанне ПАРЕ ў дэпартацыі ўкраінцаў такім чынам, што кіраўніцтва рэспублікі зрабіла ўсё, каб украінскія дзеці ў нашай краіне маглі «адчуць шчаслівае і бесклапотнае дзяцінства». Тады беларускі бок заявіў, што абураны рэзалюцыяй Парламенцкай асамблеі Рады Еўропы пад назвай «Дэпартацыя і гвалтоўныя перамяшчэнні ўкраінскіх дзяцей і іншых грамадзянскіх асоб у Расійскую Федэрацыю або на часова акупаваныя ўкраінскія тэрыторыі: стварэнне ўмоў для іх бяспечнага вяртання, спыненне гэтых злачынстваў і пакаранне вінаватых» і згадваннем у гэтым дакуменце Рэспублікі Беларусь.