Рыгор Кастусёў: Улада не збіраецца ўносіць змены ў выбарчае заканадаўства

Перамены ў выбарчым заканадаўстве патрэбныя, але ці мы іх дачакаемся?

Партыя БНФ заклікае ўлады ўнесці змены ў выбарчае заканадаўства згодна з рэкамендацыямі міжнародных арганізацый. Кіраўніцтва Партыі БНФ заяўляе, што цяперашні склад Палаты прадстаўнікоў сфармаваны “праз антыканстытуцыйны і нелегітымны спосаб, які не быў выбарамі, а быў працэдурай адміністратыўнага прызначэння спісу лаяльных асоб, якія не з’яўляюцца прадстаўнікамі беларускага народа”.

Патрабаваць перамены трэба, але іх перспектывы старшыня партыі БНФ Рыгор Кастусёў ацэньвае даволі скептычна:

— Лідзія Ярмошына ўжо заявіла, што прэзідэнцкая кампанія ўжо хутка, і часу на змены ў выбарчым заканаўстве няма. Яна дала ўсім зразумець, што ніякіх зменаў не будзе, і кампанія па выбарах прэзідэнта адбудзецца па існуючым выбарчым заканадаўстве, і цалкам верагодна і надалей у перспектыве грамадзяне Беларусі зменаў у выбарчае заканадаўства не дачакаюцца.

 І ў гэтай сувязі сойм Партыі БНФ заклікае міжнародныя парламенцкія структуры “грунтаваць стасункі з Палатай прадстаўнікоў з улікам таго, што яе новы склад не быў абраны ў адпаведнасці з абавязацельствамі АБСЕ і іншымі міжнароднымі стандартамі дэмакратычных выбараў”.

БНФ рыхтуецца да прэзідэнцкай кампаніі, якая таксама, як прагназуюць у партыі, будзе праходзіць “па звычайных беларускіх стандартах”.

Улад Грынеўскі, Беларускае Радыё Рацыя