ААН: У 2023 годзе кожнаму 23-му чалавеку спатрэбіцца гуманітарная дапамога. Але на ўсіх яе можа не хапіць

Для аказання дапамогі 339 мільёнам чалавек, якія пакутуюць праз «экстрэмальныя з'явы» 2022 года, спатрэбяцца рэкордныя 51,5 млрд долараў.
Будынкі Харкава пасля абстрэлаў. Фота Алеся Мінава

Будынкі Харкава пасля абстрэлаў. Фота Алеся Мінава



Колькасць людзей, якія будуць мець патрэбу ў гуманітарнай дапамозе ў 2023 годзе, павялічылася амаль на чвэрць у параўнанні з мінулым годам, паколькі кліматычны крызіс, вайна ва Украіне і найбуйнейшы ў сучаснай гісторыі глабальны харчовы крызіс штурхаюць мільёны людзей на мяжу выжывання, піша theguardian.com.

Рэкордныя 339 мільёнаў чалавек, што на 65 мільёнаў больш, чым у мінулым годзе, пацерпяць у наступным годзе ў выніку «экстрэмальных з'яў» 2022 года і будуць мець патрэбу ў тэрміновай дапамозе, заявіў намеснік генеральнага сакратара ААН па гуманітарных пытаннях Марцін Грыфітс.

ААН і партнёрскія агенцтвы просяць у донараў 51,5 мільярда долараў для фінансавання намаганняў па аказанні дапамогі, што з'яўляецца яшчэ адной рэкорднай лічбай і павелічэннем на 25% у параўнанні з пачаткам 2022 года. Яны кажуць, што, хоць большасць донараў застаюцца адносна шчодрымі, патрэбы рэзка ўзраслі.

Расійскае ўварванне ва Украіну, якое вымусіла мільёны людзей пакінуць свае дамы і разбурыла асноўныя медыцынскія ўстановы, значна пагоршыла харчовы крызіс для многіх краін, такіх як Самалі, Афганістан і Емен, якія таксама змагаліся з разбуральнымі наступствамі ўласных унутраных канфліктаў. У Пакістане маштабныя паводкі былі названыя генеральным сакратаром ААН Антоніу Гутэрышам «мусонам на стэроідах».

Прадстаўляючы глабальны гуманітарны агляд (GHO) ААН за 2023 год, Грыфітс сказаў: «Няма ніякіх сумненняў у тым, што 2023 год захавае гэтыя тэндэнцыі». «Лічба ў 339 мільёнаў — або кожны 23 чалавек — дадаў ён, эквівалентная трэцяй па колькасці насельніцтва краіне ў свеце [пасля Кітая і Індыі], так што гэта фенаменальная лічба, і гэта сумная лічба».

Тыя, хто, па прагнозах, мае патрэбу ў дапамозе, раскіданыя па 68 краінах, але ў 10 з іх, дзе ААН апублікавала планы гуманітарнай дапамогі на суму больш за 1 мільярд долараў, патрэбы асабліва высокія. Сярод іх Афганістан, Сірыя, Емен, Украіна, Эфіопія, Дэмакратычная Рэспубліка Конга і Самалі.

ААН і партнёры хочуць мець магчымасць дапамагчы 230 мільёнам чалавек, якія маюць патрэбу, спадзяваючыся, што іншыя арганізацыі і донары пакрыюць астатнія 109 мільёнаў. Але асноўная праблема заключаецца ў фінансаванні: сёлета на гуманітарную дапамогу было выдзелена толькі 44% неабходных рэсурсаў.

Грыфітс сказаў, што гэта не віна донараў, большасць з якіх (акрамя Вялікабрытаніі) захавалі ўзровень выдаткаў на дапамогу. Паводле яго слоў, праблема заключаецца ў маштабах шматлікіх і ўзаемазвязаных крызісаў, з якімі сутыкаецца такая вялікая частка насельніцтва свету.

У GHO ААН папярэджвае, што да канца гэтага года не менш за 222 мільёны чалавек у 53 краінах сутыкнуцца з вострым недахопам харчавання, а 45 мільёнаў чалавек у 37 краінах рызыкуюць памерці ад голаду. Інфраструктура грамадскай аховы здароўя знаходзіцца пад ціскам з-за пагрозы Covid-19, а таксама з-за новых успышак халеры і іншых захворванняў.

«Для людзей, якія знаходзяцца на мяжы, гэты заклік — выратавальны круг. Для міжнароднай супольнасці гэта стратэгія выканання абяцання нікога не пакінуць без увагі», — сказаў Грыфітс.

.

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: