Бальніцы перапоўненыя, моргі і крэматорыі не спраўляюцца: што адбываецца зараз у Кітаі
Пасля адмены палітыкі «нулявога кавіда» Кітай сутыкнуўся з рэзкім усплёскам захворванняў і ўжо не ў стане стрымаць імклівае распаўсюджванне віруса.
Ілюстрацыйнае фота Дзмітрыя Дзмітрыева
Паводле неафіцыйнай інфармацыі, 248 мільёнаў чалавек, або 18 працэнтаў насельніцтва Кітая, заразіліся каронавірусам толькі за першыя тры тыдні снежня — пасля таго, як улады КНР знялі абмежаванні на кантакты паміж людзьмі. Гэтыя лічбы рэзка кантрастуюць з афіцыйнай статыстыкай з пачатку снежня. Згодна з ёй, захварэлі па ўсёй краіне толькі 62 тысячы чалавек.
Адначасова паступаюць звесткі, што бальніцы ў Кітаі перапоўненыя, а крэматорыі ўжо не спраўляюцца з колькасцю памерлых. Агенцтва «Reuters» са спасылкай на цэнтр «Airfinity», які даследуе медыцынскія даныя, паведаміла, што ў Кітаі штодня ад каронавіруса паміраюць каля 5 тысяч чалавек. Паводле ацэнак «Airfinity», хваля COVID-19 у Кітаі можа мець два пікі: 3,7 млн. новых выпадкаў заражэння на дзень у сярэдзіне студзеня ў рэгіёнах, дзе на дадзены момант колькасць захворванняў расце, і 4,2 млн. на дзень у сакавіку ў іншых правінцыях. Таксама ёсць меркаванне, што смяротнасць можа дасягнуць 2 млн. выпадкаў.
У Шанхаі і яго ваколіцах адкрыта каля 3 000 кансультацыйных цэнтраў, дзе людзі могуць атрымаць рэкамендацыі па лячэнні, а таксама гарачкапаніжальныя і абязбольвальныя лекі. Гэта зроблена, каб супакоіць людзей, і паказаць, што ўлады цяпер настроеныя развязваць праблемы больш мякка.
Нагадаем, на пачатку снежня пасля масавых пратэстаў у некалькіх рэгіёнах улады КНР рэзка знялі каронавірусныя абмежаванні. У сувязі з гэтым рашэннем згадвалася, што новыя варыянты штаму «амікрон», якія зараз рэгіструюцца ў Кітаі, менш небяспечныя.
Разам з тым, стала вядома, што Нацыянальная камісія аховы здароўя Кітая з нядзелі перастала публікаваць штодзённыя даныя аб захворванні. Афіцыйная прычына закрыцця статыстыкі — «сумневы ў яе надзейнасці». Так напрыклад, паводле даных на 23 снежня ў цэлым па КНР, у адпаведнасці з афіцыйнай інфармацыяй, зарэгістравана 4103 новых хворых. Такое разыходжанне ў лічбах паказвае на недакладнасць звестак, якія мае ўрад краіны, і велізарныя праблемы, з якімі сутыкнуўся Кітай пасля паслаблення палітыкі ў дачыненні да Covid-19. Аналагічныя меры — надзвычайны ўзровень цэнзуры — ужо прадпрымаліся кітайскімі ўладамі падчас падаўлення «антыкавідных» пратэстаў.