Дасье ў карыкатурах: Ці будзе адбудаваны Нотр-Дам?

 «Мы адбудуем яго», — з такой патэтычнай заявай выступіў Эмануэль Макрон на руінах парыжскага кафедральнага Сабору, які згарэў 15 красавіка. Прэзідэнтам нават быў названы тэрмін рэканструкцыі комплексу — пяць гадоў. Францыя і ўвесь свет, шакаваныя катастрофай, тут жа адгукнуліся на ініцыятыву.

Мастак Том Чыцці (Tom Chitty) нават стварыў тэматычны малюнак, які стаў сімвалам руху за адбудову Сабору.

Спачатку ўсё сапраўды ішло добра. Фонд аднаўлення храма проста завалілі грашыма. Усяго за два дні на рахункі фонду прыйшло больш за два мільярды еўра. Многія ўрады прапанавалі дапамогу французам. Дарэчы на ​​гэтай глебе ў Расіі, якая таксама заклапацілася лёсам Нотр-Дама, з'явіўся анекдот: «Жыхары Смаленска думаюць, што б такое падпаліць, каб Крэмль звярнуў на іх увагу». Аднак паступова эйфарыі стала менш. Прэса баіцца, што хітрыя бізнесмены пастараюцца камерцыялізаваць смутак па Сабору, што адаб'ецца на тэмпах яго рэканструкцыі. Часопіс Mariane прагназуе нават стварэнне службы дастаўкі ежы пад назвай «Кафедраль».

Скепсіс наконт хуткага аднаўлення Нотр-Дама выклікае і грамадскае супрацьстаянне, якое працягваецца ў Францыі. Палярызацыю грамадства мастак Ёп Бертрамс (Joep Bertrams) адлюстраваў у выглядзе спрэчкі дзвюх хімер — манументальных містычных істот на даху Нотр-Дама. Адна з іх, апранутая ў жоўтую камізэльку, сімвалізуе лагер апазіцыі. Хімеры (ці як іх таксама называюць — гаргуллі) лаюцца, не звяртаючы ўвагу на тое, што вакол іх тлеюць недабіткі храма.

Нарэшце, чым далей, тым больш спрэчак наконт таго, як павінен выглядаць адбудаваны Сабор. Адны за тое, каб аднавіць арыгінальную канструкцыю. Іншыя за інавацыі. Паколькі сярэднявечных будаўнічых матэрыялаў ужо тэхнічна не дастаць, адыход ад канона аб'ектыўны, кажуць прыхільнікі прагрэсу. А эколагі наогул заклікаюць абсталяваць будынак зялёнымі тэхналогіямі. У роспачы мастак Хайо дэ Рэйігер (Hajo de Reijger) прапануе адмовіцца ад рэканструкцыі і абмежавацца вытворчасцю запалак «Нотр-Дам». Кожны можа сабраць свой «Нотр-Дам» і пры жаданні яго спаліць

Падобна на тое, што французам не застаецца нічога іншага, як запрасіць беларускіх падрадчыкаў. На думку «Новага Часу», яны не толькі адбудуюць комплекс, але таксама мадэрнізуюць у духу нашых уяўленняў аб тым, якім павінен быць будынак, што грае ролю візітоўкі краіны.