Францыя. Быць, як шведы

Гледзячы на дэбаты на старонках французскай прэсы, хутка мы станем сведкамі заняпаду традыцыйнай народнай культуры раманскіх народаў Еўропы.

Прычына ў тым, што яе кодэкс вымагае быць кантактным і шмат часу праводзіць у публічнай сферы. Французы, італьянцы і іспанцы вельмі любяць камунікаваць (часта ў кампаніі), цалавацца, абдымацца і гэтак далей. Усё гэта, паводле некаторых аўтараў, і тлумачыць маштаб захворванняў у еўрапейскіх раманскіх краінах. 

У сакавіку было дастаткова ўсяго двух тыдняў, каб у той жа Іспаніі вірус забіў пяць тысяч чалавек. З іншага боку, на поўначы Еўропы вірус наступае больш павольна з прычыны, як лічыцца, больш халоднай культуры тутэйшых. Скандынавы не лезуць абдымацца з сябрамі на вуліцы, і ўвогуле намагаюцца жыць на дыстанцыі ад суседзяў.

 Усё гэта дае падставы выданню Le Depeche, каб звярнуцца да французаў з арыгінальным заклікам: «Пачынаючы з гэтага дня мы павінны стаць менш прыязнымі і больш падобнымі да шведаў!»

Паводле французскай прэсы