Нашчадак Адама Міцкевіча хоча змагацца за правы беларусаў у Літве

Раман Гарэцкі-Міцкевіч – прапрапраўнук Адама Міцкевіча, грамадзянін Францыі, які ўжо каля 20-ці гадоў жыве ў Вільні.

pamyatnik_adamu_mickevichu_vilnyus.jpg

Ён лічыць, што ў сучаснай Літве правы нацыянальных меншасцяў не рэалізуюцца напоўніцу і плануе змяніць сітуацыю. Дзеля гэтага прымае ўдзел у самаўрадавых выбарах у Вільні, стварыўшы шматнацыянальны выбарчы камітэт:
Я стварыў выбарчы камітэт, і ў выбарчых спісах ёсць палякі, літоўцы, рускія і адзін беларус. Я хачу, каб у Літве з большым шанаваннем ставіліся да розных культур, якія тут прадстаўлены, і якія ёсць культурамі, звязанымі з традыцыямі Вялікага Княства Літоўскага. Літве трэба больш шанаваць іншыя народы, бо яны належаць і да літоўскай гісторыі. Таксама я хачу, каб большую вагу мела грамадзянства, а не нацыянальнасць, бо гэта ўласна і ёсць традыцыяй ВКЛ. Я хачу, каб літоўцы памяталі, што доўгі час адміністрацыйнай мовай ВКЛ была беларуская мова.
Я хачу, каб літоўская дзяржава звярнула большую ўвагу на сваіх грамадзян, якія маюць іншую, чым літоўская, нацыянальнасць,
– дадае Раман Гарэцкі-Міцкевіч.
У выпадку перамогі ён збіраецца падтрымліваць беларускую культуру і мову:
– Калі мы выйграем выбары і трапім у самаўрад, то зробім усё, каб беларусы ў Вільні мелі свой Дом культуры, які б дапамагаў у развіцці беларускай мовы і беларускай культуры.
Раман Гарэцкі-Міцкевіч валодае літоўскай мовай, таксама гаворыць па-польску і, зразумела, па-французску. Беларускай мовы пакуль не ведае, але лічыць яе надзвычай прыгожай і мілагучнай.
Самаўрадавыя выбары ў Літве пройдуць у бліжэйшую нядзелю, трэцяга сакавіка.
racyja.com