Паўднёвая Асеція. Навошта адраджаць Аланію?

Каўказская грамадскасць актыўна абмяркоўвае ініцыятыву кіраўніка Паўднёвай Асеціі Леаніда Цыбілава аб перайменаванні рэспублікі, якая фармальна з’яўляецца часткай Грузіі, а фактычна — патранатам Масквы. Цыбілаў прапанаваў перайменаваць Паўднёвую Асецію ў Рэспубліку Паўднёвая Асеція — Аланія.

Аланія — сярэднявечная дзяржава, якая існавала у перадгор’ях Паўночнага Каўказу з пачатку I тысячагоддзя. У сярэдзіне XIV стагоддзя Аланія знікла пад нашэсцем татара-манголаў. Навошта патрэбна адраджаць Аланію праз 600 гадоў? 

Цыбілаў кажа пра аднаўленне гістарычнай справядлівасці, аднак шмат хто бачыць тут больш глабальную фабулу. Мяркуюць, што за кошт перайменавання рэспублікі ў Цхінвалі запускаюць працэс аб’яднання нефармальнай рэспублікі з Паўночнай Асеціяй — суб’ектам Расійскай Федэрацыі, дзе таксама папулярна ідэя перайменаваць край у Аланію. 

З’яўленне на мапе двух дзяржаўных фармаванняў з назвай «Аланія» стварае падмурак для такога аб’яднання пад дахам Расіі. 

Цікава, што брэнд «Аланія» таксама папулярны сярод інгушоў і чаркесаў. Іх інтэлектуалы таксама заклікаюць унесці ў назвы рэспублік слова «Аланія». 

Не выключана, што нас чакае незвычайная барацьба: хто з каўказскіх народаў з’яўляецца сапраўдным нашчадкам аланаў.

Паводле расійскай прэсы