Пуцін прапанаваў жыхарам Крыма выбраць паміж Расіяй і электрычнасцю

Расійскі прэзідэнт Уладзімір Пуцін прапанаваў правесці апытанне ў Крыме і спытаць жыхароў паўвострава, ці згодныя яны на вяртанне энергазабеспячэння з боку Украіны, калі ў кантракце на пастаўкі электрычнасці Крым будзе названы яе тэрыторыяй.



Адключэнне электрычнасці ў Крыме. Фота AFP.

Другое пытанне будзе гучаць як «ці гатовыя вы да часовых цяжкасцяў, звязаных з нязначнымі перабоямі энергазабеспячэння на працягу бліжэйшых 3-4 месяцаў?». Аб ініцыятыве Пуціна расказаў міністр энергетыкі Расіі Аляксандр Новак, перадае ВВС.

«Кіраўнік Расіі даручыў тэрмінова звярнуцца да аднаго з вядучых прафесійных агенцтваў для таго, каб правесці сацыялагічнае апытанне насельніцтва Крыма і Севастопаля па наступных пытаннях. Першае пытанне: ці падтрымліваеце вы заключэнне камерцыйнага кантракту з Украінай на пастаўку часткі электраэнергіі ў Крым і Севастопаль, калі ў ім будзе паказана, што Крым і Севастопаль з’яўляюцца часткай Украіны», — сказаў Новак журналістам.

Міністр таксама сказаў, што для Масквы непрымальная прапанаваная Украінай фармулёўка новага кантракта на пастаўку электрычнасці. Расія не згодна з тым, што Крым у ім называецца тэрыторыяй Украіны.

Па словах Новака, пытанне аб заключэнні кантракту будзе вырашана толькі пасля апытання.

У інтэрв’ю каналу «Расія-24» Новак таксама сказаў, што ў выпадку, калі дамова не будзе заключаная, то на працягу некалькіх месяцаў дэфіцыт электразабеспячэння будзе пакрывацца за кошт дызельных генератараў.

У сераду, 30 снежня Украіна цалкам спыніла пастаўкі электрычнасці на анэксаваны Расіяй паўвостраў. Прычынай адключэння ў Крыме назвалі аварыю на лініі электраперадач.