У Эстоніі паліцыя затрымала расійскіх прапагандыстаў. Пазней іх выслалі ў РФ

Расійскае выданне «Известия» паведаміла, што іх супрацоўнікаў знялі з цягніка Нарва — Талін і
затрымалі ў Эстоніі. Як паведамляе Дэпартамент паліцыі і памежнай аховы (PPA),
затрыманыя парушылі візавы рэжым.

«Нашы карэспандэнт Ксенія Салдатава і аператар Дзмітрый Цімафееў ехалі ў цягніку з Нарвы ў Талін. У вагоне да іх падышлі паліцыянты, знялі іх з цягніка і даставілі ў аддзяленне паліцыі», — паведамляе выданне.

«Цяпер журналісты чакаюць прадстаўніка міграцыйнай службы. У чым менавіта іх абвінавачваюць, невядома», — гаварылася ў паведамленні.

«Известия» сцвярджалі, што затрыманыя супрацоўнікі наведвалі краіну як турысты, але не змаглі праігнараваць апошнія падзеі, якія адбываліся ў Эстоніі. Яны збіраліся падрыхтаваць матэрыялы аб абмежаванні выдачы віз грамадзянам Расіі і пазбаўленні танка Т-34 статусу помніка.

Пазней выданне паведаміла, што ў журналістаў адабралі мабільныя тэлефоны, таму звязацца з імі немагчыма. У суботу, 13 жніўня, «Известия» паведамілі, што іх супрацоўнікі вярнуліся ў Расію.

Па словах кіраўніка памежбюро Ідаскай прэфектуры Урмаса Элмі, двое грамадзян Расіі, 30-гадовая жанчына і 40-гадовы мужчына, заехалі ў Эстонію праз нарваўскі пагранпункт у пятніцу каля поўдня. Яны прад'явілі на мяжы шэнгенскія візы, выдадзеныя Італіяй і Фінляндыяй, і заявілі, што знаходзяцца ў турыстычнай паездцы.

«Пасля гэтага мужчына і жанчына адправіліся да нарваўскага танка і пачалі весці там прапагандысцкую працу. Калі яны затым селі ў цягнік Нарва — Талін і паехалі ў бок Таліна, у Йыхві ў цягнік зайшоў паліцэйскі патруль і адвёз мужчыну і жанчыну ў аддзяленне паліцыі для праверкі», — сказаў Элмі.

Кіраўнік памежбюро падкрэсліў, што нельга працаваць падчас паездак з турыстычнымі мэтамі, гэта парушэнне візавага рэжыму, таму «іх візы будуць ануляваныя, ім выдадзена забарона на ўезд у Эстонію, і яны былі высланы ў Расію».

Паводле rus.postimees.ee.

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: