У Еўрасаюзе афіцыйна пачалася масавая вакцынацыя ад каронавіруса

Усяго ў ЕС налічваецца 450 млн жыхароў, але ад SARS-CoV-2 будуць пакуль прывіваць толькі дарослае насельніцтва. У Нямеччыне да вакцынацыі прыступілі на суткі раней.

У дзяржавах Еўрапейскага Саюзе ў нядзелю, 27 снежня, афіцыйна стартавала масавая вакцынацыя ад каронавіруса SARS-CoV-2. Паведамленні аб пачатку кампаніі паступілі, у ліку іншага, з Італіі, Чэхіі і з Кіпра. У Празе чэшскаму прэм'ер-міністру Андрэю Бабішу прышчэпку зрабілі ў прысутнасці тэлежурналістаў.
З 450 млн жыхароў ЕС прышчэпку пакуль змогуць атрымаць толькі дарослыя ў парадку прыярытэтнасці, якая залежыць ад групы рызыкі. На першым этапе будуць вакцынаваць людзей ва ўзросце ад 80 гадоў і тых, хто мае сур'ёзныя праблемы са здароўем. Паступова ўзроставая планка будзе зніжацца і ў выніку вакцыну змогуць атрымаць усе жадаючыя.
Вакцына, распрацаваная нямецкай BioNTech і амерыканскай Pfizer, пачала паступаць у краіны ЕС 25 снежня. Старшыня Еўракамісіі Урсула фон дэр Ляйен 26 снежня (Ursula von der Leyen) паведаміла, што вакцына ад каронавіруса дастаўлена ва ўсе краіны ЕС. Яна назвала прышчэпачную кампанію "кранальным момантам яднання" еўрапейскай супольнасці і "устойлівым выхадам з пандэміі".
У Нямеччыне, Венгрыі і Славакіі вакцынацыя пачалася на дзень раней запланаванага тэрміну. У ФРГ прышчэпку атрымалі некалькі дзесяткаў жыхароў аднаго з дамоў для састарэлых у федэральнай зямлі Саксонія-Анхальт, у тым ліку 101-гадовая жанчына. У адказ на крытыку дырэктар дома заявіў, што "кожны дзень чакання - лішні".
dw.com