Сілы АДКБ не ўдзельнічаюць у баявых аперацыях у Казахстане. Але гэтыя вайскоўцы ўжо атрымалі баявы досвед ва Украіне

Сілы АДКБ у Казахстане не выкарыстоўваюцца ў баявых аперацыях. Пра гэта заявіў першы намеснік кіраўніка адміністрацыі прэзідэнта Казахстана Даўрэн Абаеў.

"Што да АДКБ, дык хачу адзначыць наступнае. Уведзены міратворчы кантынгент краін АДКБ. Місія з'яўляецца міратворчай. Салдаты АДКБ не ўдзельнічаюць у баявых дзеяннях і не займаюцца ліквідацыяй баевікоў. Не трэба блытаць міратворчую місію з уводам Калектыўных сіл аператыўнага рэагавання", — заявіў Абаеў, перадае телеграм-канал Orda.kz.

Па словах Абаева, вайскоўцы  сіл АДКБ адказваюць за прыкрыццё і ахову дзяржаўных аб'ектаў. Ён дадаў, што зачыстку Алматы 6 студзеня праводзілі падраздзяленні "Арыстан", "Арлан", "Беркут" і Міністэрства абароны.

АДКБ вырашыў даслаць у Казахстан каля 2,5 тысячы вайскоўцаў, якіх называюць “міратворчымі сіламі”. Раней прэзідэнт Казахстана Касым-Жамарт Такаеў звярнуўся па дапамогу да АДКБ і назваў тое, што адбываецца ў краіне, “тэрарыстычнай атакай”.

Ад Беларусі ў Казахстан паляцела рота са складу 103-й паветрана-дэсантнай Віцебскай брыгады сіл спецыяльных аперацый.

Між тым, журналісты InformNapalm прыйшлі да высновы, што шматлікія расійскія падраздзяленні, дасланыя цяпер у Казахстан, ужо маюць баявы досвед ва Украіне. Так, напрыклад, 45-я асобная брыгада спецыяльнага прызначэння ПДВ, 98-я дывізія ПДВ і войскі цэнтра спецыяльнага прызначэння РФ "Сенеж". Згодна з расследаваннямі міжнароднай разведвальнай супольнасці InformNapalm, усе гэтыя падраздзяленні РФ прымалі ўдзел у агрэсіі супраць Украіны не толькі ў падчас аперацыі захопу і акупацыі Крыму, але і ў баявых дзеяннях на Данбасе.

Паводле belmarket.by, informnapalm.org