Украіна. 75 гадоў таму Кіеў стаў сталіцай

Грамадскасць Кіева і Харкава актыўна спрачаецца з нагоды незвычайнага юбілею. Роўна 75 гадоў таму ўрад Украінскай ССР пераехаў з Харкава ў Кіеў. Адпаведна, Кіеў ператварыўся ў галоўны горад рэспублікі. Нагадаем, што Харкаў стаў сталіцай у 1917 годзе. У прынцыпе, бальшавікі нічога асаблівага супраць Кіева не мелі, аднак там засядала Цэнтральная рада. Давялося шукаць альтэрнатыву. Так сталіцай савецкай Украіны стаў Харкаў. Пасля заканчэння грамадзянскай вайны пераносіць сталіцу не рашыліся: недалёка была мяжа з Польшчай. Аднак да пачатку 1930-х гадоў дыскусія ўнутры партыі на тэму, дзе ж быць сталіцы УССР, зноў ажывілася. Тагачасны кіраўнік украінскай кампартыі выклаў наступныя аргументы за змену рэзідэнцыі ўраду: перанос сталіцы будзе сведчыць, што СССР нікога не баіцца, і дазволіць разбурыць нацыяналістычнае гняздо, якім быў у 1920-я гады Кіеў (тут некалькі разоў раскрываліся змовы петлюраўцаў). Сталін падтрымаў ініцыятыву. Сёння жыхары Кіева гадаюць, што прынёс ім статус сталіцы. Усе пагаджаюцца, што дзякуючы таму горад перажыў сапраўдную мадэрнізацыю і стаў буйным навуковым, прамысловым цэнтрам. З іншага боку, непасрэдным наступствам таго пераносу стала маштабнае разбурэнне гістарычнага цэнтру Кіева, на месцы якога камуністы стварылі ўрадавыя кварталы.

Па матэрыялах “Украіна Молода (Украіна)