Украіна. Размаўляйце па-слабажанску

Ва Украіне выбухнуў цікавы скандал. Прычынай стаў выступ кіраўніка МУС Арсена Авакава ў судзе па справе экс-прэзідэнта Віктара Януковіча.

 Фота cont.ws

Даючы паказанні 11 снежня, Арсен Авакаў, замест таго, каб гаварыць па-ўкраінску, вырашыў мець зносіны з судом, паводле яго слоў, на «слабажанскай мове або, як яе некаторыя называюць, рускай».

Такі пасаж выклікаў шмат іранічных каментараў, паколькі ніякай слабажанскай мовы, натуральна, няма. Існуе хіба слабажанская гаворка, якая ўяўляе чысты суржык — сумесь украінскай і рускай моваў. Некаторыя прапануюць надаць слабажанскай статус другой дзяржаўнай мовы.

Шмат хто ў сеціве дзеліцца поспехамі ў вывучэнні замежных моваў — маўляў, прачнуўся зранку і пачаў свабодна размаўляць па-слабажанску.

У той жа час шматлікіх нацыяналістаў паводзіны Авакава абурылі. Некаторыя нават прапанавалі яго аштрафаваць, абавязаўшы выплаціць 10 тысяч грыўняў (каля $367) за кожнае рускае слова.

Жарты жартамі, аднак некаторыя эксперты лічаць выхадку Авакава вельмі небяспечнай. Тое, што адзін з вядучых міністраў дазваляе сабе казаць пра наяўнасць асобнай рэгіянальнай мовы, стварае алібі для іншых лінгвістычных эксперыментаў. Прынамсі, пра існаванне асобнай адэскай мовы даўно кажуць у Адэсе.

Паводле ўкраінскай прэсы