Украінскі суд вырашыў выдаць Беларусі даныя чалавека, які абразіў сілавіка

Саломенскі раённы суд у Кіеве ў асобе суддзі Максіма Вішняка па хадайніцтве пракуратуры прыняў рашэнне аказаць міжнародную прававую дапамогу Беларусі і абавязаў аператара сувязі прадаставіць інфармацыю аб абаненце, з нумара якога паступалі пагрозы супрацоўніку віцебскага АМАП.

Хадайніцтва падавала пракурор Саломенскай акруговай пракуратуры Кацярына Данілюк. У пракуратуру паступіў зварот ад кампетэнтных органаў Беларусі аб аказанні садзейнічання ў расследаванні крымінальнай справы, узбуджанай у Віцебскім гарадскім аддзеле Следчага камітэта 24 лютага 2021 года па арт. 364 КК РБ.
Згодна з матэрыяламі справы, 13 Жніўня 2020 года ў Telegram пацярпеламу прыйшло паведамленне з абразамі і пагрозамі ў адрас яго і яго блізкіх сваякоў ад неўсталяванай асобы. Пацярпелы з'яўляецца намеснікам камандзіра АМАП Віцебскай вобласці (пра каго менавіта гаворка, невядома). Беларусь звярнулася з просьбай аб садзейнічанні і аказанні часовага доступу да рэчаў і дакументаў, якімі валодае юрыдычная асоба і якія ўтрымліваюць інфармацыю аб карыстальніку абаненцкага нумара, з якога прыходзілі паведамленні. Відавочна, гаворка ідзе пра доступ да даных аператара мабільнай сувязі.
Паседжанне прайшло без удзелу пракурора і прадстаўніка аператара сувязі: пракурор прасіла яго не запрашаць, каб пазбегнуць рызыкі знішчэння або змены дакументаў.
Суддзя прыняў рашэнне задаволіць хадайніцтва, бо запыт законны, а без запытанай інфармацыі беларускі бок не зможа расследаваць крымінальную справу.
Рашэннем суда пракурорам прадастаўлены доступ да звестак, якія захоўваюцца ў аператара сувязі:

• анкетныя даныя асобы, на якую быў зарэгістраваны мабільны нумар,
• інфармацыя пра ўваходныя і выходныя злучэнні абанента ў перыяд з 13 жніўня па 24 лютага з указаннем даты, часу і адрасоў базавых станцый, у зоне дзеяння якіх здзяйсняліся злучэнні.

Пры гэтым, калі аператар не прадаставіць доступ да інфармацыі, суд можа даць дазвол на правядзенне ў яго вобшуку і канфіскацыі неабходных прадметаў і дакументаў.
Судовае рашэнне сапраўднае два месяцы. Яно не падлягае абскарджанню.
reform.by