Хто павышаў кошты на “камуналку”: міністэрствы ківаюць адно на адно
"Хто гэтую балду прыдумаў? — запытваецца Аляксандр Лукашэнка пра новыя кошты ў "жыроўцы". — Значыць, начапіце кайданкі тым, хто не выканаў даведзеныя па маім загадзе тарыфы. Тут павінен быць спіс, хто гэтую "балду" прыдумаў. Хопіць з імі жартаваць. Мы тут нешта лічым, плануем, а яны робяць усё па-свойму".
Хто павысіў кошты?
Ліфт
Тарыф зацверджаны Рашэннем Мінгарвыканкама ад 13 студзеня 2016 года №18. 617 рублёў з кожнага квадратнага метра агульнай плошчы кватэры (раней не было).
"Кошты падымалі ў Міністэрстве ЖКГ", — адразу адказваюць у "Мінскай жыллёвай гаспадарцы".
У міністэрстве іншая пазіцыя:
"Плата за тэхнічнае абслугоўванне ліфта ўсталёўвалася Мінгарвыканкамам у Мінску”.
Плата за эксплуатацыю ліфта, апроч усяго, прапісвалася ў прэзідэнцкім указе №535.
Ацяпленне (тарыф вырас на 33%)
Пад Пастановай Савета міністраў ад 5 студзеня, якое павышае тарыфы на газ і ацяпленне, подпіс прэм'ер-міністра Андрэй Кабякова.
“Ацяпленне — гэта Мінэканомікі і Мінэнерга", — называюць адказных за павышэнне коштаў у Міністэрстве ЖКГ.
У Мінэканомікі ад адказнасці не ўхіляюцца, але кажуць, што над тарыфамі працуе і Мінэнерга, і Міністэрства ЖКГ, якое ад гэтага адхрысцілася:
“Гэта сумесная праца некалькіх дзяржорганаў, дзе Мінжылкамгас — першы. Вы не першыя, хто сутыкаецца з такім адсылам да Мінэканомікі з боку Мінжылкамгасу. Саромеюцца, напэўна”.
Вада і каналізацыя (у лютым вырасце ў 3,5 разы)
Тарыфы ўведзеныя Рашэннем Мінгарвыканкама ад 13 студзеня 2016 года №18. Капрамонт і тэхабслугоўванне дома — таксама тут.
“Тарыфы зацвярджаюцца рашэннем Мінгарвыканкама”, — пацвярджаюць Еўрарадыё ў Мінскводаканале.
Пачуць меркаванне ад Мінгарвыканкама немагчыма: два дні кампетэнтны супрацоўнік не адказвае на званкі. Хутчэй за ўсё, прычына не ў патрабаваннях прэзідэнта начапіць на адказных кайданкі: у прыёмным пакоі запэўніваюць, што спецыяліст на месцы.
Дарэчы, 18 дзён таму на прэс-канферэнцыі старшыня Мінгарвыканкама Андрэй Шорац (які прысутнічаў на нарадзе ў прэзідэнта пра ЖКГ) станоўча гаворыць аб новаўвядзеннях у аплаце "камуналкі":
“Мы ідзем па правільным шляху. Раней атрымлівалася: чым большая ў чалавека кватэра, тым больш дзяржава датавала паслугі. За ўсё трэба плаціць. Прычым аплата павінная быць зразумелай і празрыстай. Апошнія дзеянні ўладаў у гэтым кірунку я лічу правільнымі. Мы ўбачым, колькі і за што мы плацім. Зможам і самі рэгуляваць, колькі нам плаціць”.
Можа, трэба было сказаць гэта прэзідэнту?