Чысты прыбытак арганізацый прамысловасці па выніках студзеня-кастрычніка скараціўся на 53,5%

Чысты прыбытак арганізацый прамысловасці паводле вынікаў студзеня-кастрычніка скараціўся на 53,5% у параўнанні з аналагічным перыядам мінулага года — да 2,676 млрд рублёў, сведчаць даныя Белстата.

За кастрычнік арганізацыі паказалі блізу 580 млн рублёў чыстага прыбытку, што на 42 млн рублёў менш, чым у верасні, паведамляе REFORM.by.

Рэнтабельнасць продажаў у параўнанні з вераснем скарацілася на 0,1 п.п. і склала 9,3%. Паказчык застаецца на 0,7 п. п. больш, чым у мінулым годзе.

Кастрычніцкая выручка прамысловасці склала амаль 11,6 млрд рублёў і вырасла на 400 млн рублёў у параўнанні з вераснем. За дзесяць месяцаў яна павялічылася на 0,7% да 101,43 млрд рублёў. Упершыню сёлета выручка прамысловасці паказала станоўчую дынаміку. Сабекошт рэалізаванай прадукцыі пры гэтым паменшыўся на 1% да 79 млрд рублёў.

Прыбытак ад рэалізацыі павялічыўся на 9,5% да 9,47 млрд рублёў.

У кастрычніку колькасць стратных прадпрыемстваў скарацілася на адну адзінку. Па выніках дзесяці месяцаў страты паказалі 330 прадпрыемстваў, што на 15,4% больш, чым год таму.

Пры гэтым сукупная чыстая страта стратных прадпрыемстваў вырасла ў 4,3 разы да 1,95 млрд рублёў, а на адну арганізацыю прыходзілася ў 3,7 разоў больш стратаў, або 5,9 млн рублёў.

Запазычанасць прамысловых прадпрыемстваў па крэдытах і пазыках з пачатку года вырасла на 20,9% да 52,97 млрд рублёў. Пры гэтым пратэрмінаваная запазычанасць скарацілася на 16,3% да 1,7 млрд рублёў.