Усё дрэнна? Мазырскі НПЗ рыхтуецца спыніць вытворчасць

Мазырскі НПЗ рыхтуецца спыніць практычна ўсю вытворчасць. Паводле афіцыйнай версіі, «усё па плане», але, мяркуючы па ўсім, гэта, мякка кажучы, не так.

«Завод рыхтуецца да вялікай рамонтнай кампаніі, калі практычна ўсе вытворчыя аб’екты будуць спынены», — такую версію з нагоды будучага прыпынку вытворчасці афіцыйна агучваюць у прэс-службе прадпрыемства.

Але «Штодзень» небеспадстаўна сумняцца ў тым, што ўсё ідзе па тым самым «плане».

Па-першае, на прадпрыемстве ўсё ідзе, ды ніяк не скончыцца маштабная мадэрнізацыя — нібыта ўзводзяць комплекс гідракрэкінгу цяжкіх нафтавых рэшткаў, які дасць магчымасць павысіць глыбіню перапрацоўкі нафты да 90% і звыш таго.

Па-другое, нядаўна Мазырскі нафтаперапрацоўчы завод прапанаваў велізарныя грошы за распрацоўку праграмы развіцця прадпрыемства на перыяд да 2030 года. З тэндарнай дакументацыі вынікае, што праграма развіцця Мазырскага НПЗ павінна прадугледжваць стварэнне мадэлі існуючага прадпрыемства з улікам трох варыянтаў прадукцыйнасці: 8, 10 і 12 млн тон у год. За правядзенне ўсяго комплексу работ па распрацоўцы стратэгіі прадпрыемства распрацоўшчыку гатовы заплаціць 2 984 000 рублёў, а гэта прыкладна 1 млн долараў.

Толькі ў студзені гэтага года на прадпрыемстве двойчы здараўся пажар.