Ужо не «карысныя»? Снапкоў назваў санкцыі задушлівымі і расказаў пра катастрафічныя наступствы

Санкцыі, уведзеныя ў дачыненні да Беларусі, носяць задушлівы характар, заявіў першы віцэ-прэм'ер Мікалай Снапкоў, выступаючы на сумесным пасяджэнні Палаты прадстаўнікоў і Савета Рэспублікі.


«Новыя санкцыі, якія ўжытыя да нашай краіны, носяць беспрэцэдэнтны маштаб, па вялікім рахунку задушлівы характар. Канчатковая задума Захаду — нанесці ўдар па ўзроўні жыцця нашых людзей, выклікаць іх незадаволенасць, сацыяльную напружанасць праз паслабленне патэнцыялу ключавых галін і сфер эканомікі», — цытуе яго REFORM.by са спасылкай на БелТА.

Ён адзначыў, што ўведзеныя санкцыі супраць беларускіх угнаенняў, нафтапрадуктаў, іншых відаў прадукцыі. Сур'ёзны ўдар атрымала авіяцыйная галіна.

«20% беларускай эканомікі наўпрост пацярпела ад санкцый, ускосна пацярпела астатняя частка эканомікі», — сказаў ён.

Краіна рызыкуе недаатрымаць 14 млрд долараў экспартнай выручкі з-за санкцый і вайны ў Украіне. Экспарт можа знізіцца на 30%. Кампенсаваць страты ўрад мае намер павелічэннем экспарту ў РФ на 40%.

«Перад урадам стаіць задача не дапусціць пагаршэння сітуацыі, каб захаваць параметры працы эканомікі на ўзроўні мінулага года. Мы вызначылі чатыры асноўных прыярытэты. На аснове іх выбудоўваецца работа», — сказаў Снапкоў.

Па яго словах, у кожным ведамстве ўжо працуюць штабы. Яны аператыўна рэагуюць і вырашаюць пытанне канкрэтных прадпрыемстваў і ў рамках галін.



Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: