11 траўня «Маці 328» зноў збіраюцца ў Адміністрацыю прэзідэнта

Сёння 14-ы дзень галадоўкі маці, чые дзеці сядзяць па так званым «наркаманскім» артыкуле. А 9 траўня ў кватэру ў Калінкавічах, дзе яны галадаюць, у чарговы раз прыехалі лекары.

«Памералі нам ціск і ўзровень цукру ў крыві, — кажа ўдзельніца акцыі Ліяна Шуба. — Зафіксавалі, што наш стан пагаршаецца».
У той жа дзень «Маці 328» наведаў старшыня райсавета народных дэпутатаў Віктар Замосцік, каб... павіншаваць іх з Днём перамогі. Ён папярэдзіў, што калі лекары яшчэ раз паведамяць яму пра пагаршэнне стану галадоўшчыц, давядзецца ехаць у бальніцу: «Дзяўчаты, вы павінны адсюль з’ехаць здаровымі. Я не дам вам памерці».
«Ад Замосціка, мы даведаліся, што ён звяртаўся ў Адміністрацыю прэзідэнта, там яму паведамілі: афіцыйны адказ на нашы патрабаванні, які паабяцала нам даслаць Наталля Качанава, яшчэ не адпраўлены, — распавядае Ліяна Шуба. — Разумеем, што раней за 15 траўня нам адказ не дашлюць, і мы прынялі рашэнне перапыніць галадоўку — заўтра вечарам пачнём прымаць біфідабактэрыі. 11 мая а 16:00 гадзін сустракаемся ля чацвёртага пад’езда Адміністрацыі прэзідэнта (там знаходзіцца грамадская прыёмная), будзем падаваць заяву з просьбай аб сустрэчы з Лукашэнкам».
Акцыя пратэсту працягнецца, але цяпер гэта ўжо будзе эстафета па розных гарадах Беларусі. Сёння галадоўка пачалася ў Лідзе, яе абвясціла Людміла Лапко. У нядзелю падтрымаць яе прыедзе старшыня руху «Маці 328» Ларыса Жыгар — гэта будзе яе 17-ы дзень без ежы.
«Калі шчыра, я ўжо нават не думаю пра ежу, — кажа Ларыса. — Цяпер пакуль знаходжуся ў Гродне, у мяне хварэе бацька. Ведаю, што дзяўчаты пад Пухавічамі таксама збіраліся заўтра спыняць галадоўку. Тым не менш, акцыя працягваецца. Мы хочам дамагчыся адказу на нашы патрабаванні».
Паводле Еўрарадыё