Амбасада ЗША ў Беларусі прыпыніла запіс на выдачу віз
Амбасада ЗША ў Мінску прыпыняе запіс на падачу дакументаў для атрымання неіміграцыйных візаў, калі яны не з’яўляюцца экстранымі, паведамляе «Свабода».
Пра гэта амбасада напісала на сваёй старонцы ў Фэйсбуку.
Да далейшага апавяшчэння амбасада ЗША ў Мінску прыпыняе запіс на падачу дакументаў для атрымання неіміграцыйных візаў у выпадках, якія не з’яўляюцца экстранымі.
«Калі ў вас ужо ёсць запіс на прыём па візу, вы можаце па ім звярнуцца ў найбліжэйшы час. Калі ласка, прыходзьце своечасова з адпаведнымі дакументамі. Паслугі для грамадзян ЗША будуць аказвацца і далей»,— паведаміла амбасада ЗША. Прычыны не называюцца.
Раней амбасадарка ЗША ў Беларусі Джулі Фішэр заявіла, што прадстаўнікам амбасады адмовілі ў доступе да Юрася Зянковіча, у якога, акрамя беларускага, ёсць і амерыканскае грамадзянства.
Сама Джулі Фішэр дагэтуль не можа трапіць у Беларусь, паколькі беларускія ўлады ёй не даюць візы.