Андрэй Дзмітрыеў збіраецца стварыць новую арганізацыю замест ліквідаванай «Гавары праўду!»

Сустаршыня ліквідаванага грамадскага аб'яднання «Гавары праўду!» і экс-кандыдат у прэзідэнты Андрэй Дзмітрыеў паведаміў Смартпресс пра намер стварыць новую арганізацыю.

Як адзначыў палітык, аспрэчваць рашэнне Вярхоўнага суда аб ліквідацыі «Гавары праўду!» яны не могуць, паколькі рашэнне канчатковае.
«Будзем рабіць новую арганізацыю і працягваць будаваць "Нашу партыю"», — сказаў Дзмітрыеў.
Стварэнне партыі з назвай «Наша партыя» палітык анансаваў у красавіку бягучага года.
Рух «Гавары праўду!» быў створаны ў 2010 годзе, гэтаму папярэднічала кампанія з аналагічнай назвай. Першым лідарам «Гавары праўду!» стаў беларускі паэт Уладзімір Някляеў. Доўгі час мэтай кампаніі дэклараваўся збор і распаўсюджванне рэальнай інфармацыі аб становішчы спраў у грамадстве і дзяржаве, і толькі праз паўгода Някляеў абвясціў, што мэта кампаніі — перамога на маючых адбыцца прэзідэнцкіх выбарах.
Кампанія стала базай для вылучэння Уладзіміра Някляева кандыдатам на прэзідэнцкіх выбарах 2010 года і працягнулася пасля іх завяршэння. Па дадзеных Цэнтрвыбаркама, Някляеў набраў 1,78% галасоў.
На наступных прэзідэнцкіх выбарах, у 2015 годзе, «Гавары праўду!» стала платформай для кандыдата Таццяны Караткевіч. Яна заняла другое месца з 4,44%.
На выбарах 2020 года кандыдатам у прэзідэнты стаў сустаршыня «Гавары праўду!» Андрэй Дзмітрыеў, які паводле інфармацыі ЦВК набраў 1,21% галасоў.
Рэспубліканскае даследча-асветніцкае грамадскае аб'яднанне «Гавары праўду!» было зарэгістравана ў Беларусі ў траўні 2017 года.
8 кастрычніка 2021 года Вярхоўны суд ліквідаваў «Гавары праўду!».