Артыкул, па якім пераследаваліся Аляксандр Алесін і Андрэй Гайдукоў, выключаны з Крымінальнага кодэксу
Верагоднай прычынай прыпынення крымінальнай справы супраць журналіста і вайсковага аналітыка Алякандра Алесіна стала выключэнне Законам Рэспублікі Беларусь ад 5 студзеня 2016 года з Крымінальнага кодэкса арт. 356.1 «Устанаўленне супрацоўніцтва са спецыяльнай службай, органам бяспекі або разведвальным органам замежнай дзяржавы», па якому раней Алесіну было прад'яўленае абвінавачванне.
25 студзеня стала вядома, што раней распачатая крымінальная справа ў дачыненні да журналіста і аглядальніка тыднёвіка «Белорусы і рынок» Аляксандра Алесіна прыпынена на падставе п. 5 ч. 1 арт. 246 КПК — «Немагчымасць правядзення следчых дзеянняў, без якіх не можа быць прынятае рашэнне аб заканчэнні папярэдняга следства». У сувязі з гэтым з Алесіна знятая мера стрымання ў выглядзе падпіскі аб нявыездзе.
За ўвесь перыяд дзеяння дадзенага артыкула (з лістапада 2011 года па студзень 2016 года) праваабаронцам вядомы толькі адзін выпадак яе прымянення — асуджэнне 1 ліпеня 2013 года да 1 году і 6 месяцаў пазбаўлення волі моладзевага актывіста з г. Наваполацка Андрэя Гайдукова.
Нагадаем, Аляксандр Алесін быў затрыманы супрацоўнікамі КДБ у адной з кавярняў Мінска 25 лістапада 2014 г. на сустрэчы па перадачы матэрыялаў, якія нібыта складаюць дзяржаўную таямніцу прадстаўніку аднаго з пасольстваў краіны ЕС у Беларусі. Яго падазравалі ў здзяйсненні злачынства па арт. 356 Крымінальнага кодэксу — «Здрада дзяржаве» і змясцілі ў СІЗА КДБ у г. Мінску. 10 снежня 2014 года ён быў вызвалены з-пад варты, а абвінавачанне ў дачыненні да яго была перакваліфікавана з арт. 356 на арт. 356.1.